ВЛЕН на 9 мај на конгрес ќе ја официјализира трансформацијата во политичка партија – вели Меџити

Според најавите, новиот политички субјект ќе биде позициониран како десничарска партија и ќе функционира со модел на заедничко раководење, со двајца копретседатели – Билал Касами и Изет Меџити

ВЛЕН ќе го одржи својот прв конгрес на 9 мај, на Денот на Европа, кога ќе ја официјализира трансформацијата во политичка партија. Ова денеска го најави градоначалникот на скопската општина Чаир и лидер на Демократското движење, дел од владејачката коалиција ВЛЕН, Изет Меџити, во емисијата „Само вистина“ на телевизијата Канал 5.

Меџити посочи дека изборот на датумот има симболично значење и ја одразува определбата на коалицијата кон европските вредности и интегративните процеси.

Според најавите, новиот политички субјект ќе биде позициониран како десничарска партија и ќе функционира со модел на заедничко раководење, со двајца копретседатели – Билал Касами и Изет Меџити.

„Идеолошки ќе бидеме ориентирани центар-десно. Сега се работи на операционализирање на новата платформа“,

рече тој.

Го поддржувам потегот на Касами, процесот за обединување на ВЛЕН е веќе започнат, вели Меџити

Со одржувањето на конгресот, ВЛЕН треба да го заокружи процесот на политичко консолидирање и да го дефинира своето понатамошно дејствување на политичката сцена.

На новинарска констатација дека датумот на одржувањето на конгресот ќе се поклопи со месецот во кој премиерот Христијан Мицкоски најави реконструкција на владата, Меџити рече дека ВЛЕН ќе биде едно пред реконструкцијата.

„И тоа е добро“,

кажа тој.

Посочи дека нема информации за тоа кои министри ќе бидат опфатени во реконструкцијата на владата.

Реконструкцијата на владата ќе биде во мај или во јуни, засега не гледам простор за преговори со други субјекти, вели премиерот