Според коалицијата, токму поради тоа, Османи не треба да зборува за ветинг и за реформи и да проповеда политички морал
Од Коалицијата ВЛЕН денеска побараа од потпретседателот на Демократската унија за интеграција (ДУИ), поранешен шеф на дипломатијата и актуелен кандидат за градоначалник на Општина Чаир, Бујар Османи да одговори зошто бил во Унгарија да се сретне со поранешниот премиер Никола Груевски.
„Што побаравте од него, кој избега од правдата“,
пишува во соопштението од ВЛЕН.
Според коалицијата, токму поради тоа, Османи не треба да зборува за ветинг и за реформи и да проповеда политички морал.
„Човекот што е оптоварен со бројни ревизорски извештаи за злоупотреби, човекот вмешан во отворени досиеја на СЈО, човекот што како министер даде зелено светло за влезот на МТЕЛ, распродавајќи ги албанските интереси. Тој е истиот министер што им дозволи на српските и црногорските компании да добијат лиценци за управување со бизнисот со казина, претворајќи ја државата во терен за странски олигарси“,
се вели во реакцијата од коалицијата во власта.
Османи е политичар, кој како што велат од ВЛЕН, нема храброст да се соочи со своето минато, но се осмелува да проповееда политички морал.
„Зошто Албанците беа посиромашни, помалку застапени и повеќе разочарани од кога било за време на вашата Влада. Албанците веќе ја разбраа вистината. ДУИ повеќе не е политичка куќа или заштитник на националните интереси, туку структура што постои само за да го спаси образот на неколку дискредитирани поединци“,
пишуваат од ВЛЕН.
Пред два дена, одговарајќи на новинарско прашање дали е вистина дека побарал помош од Унгарија за подобрување на односите со ВМРО-ДПМНЕ, Османи рече дека ваквите обвинувања се смешни спинови.
„Овие партиски спинови станаа смешни, го покажав мојот став вчера, народот се крена, ова не е работата за која бараме помош, не бараме помош од ниедна политичка партија, јас барам гласови од секој граѓанин. Се потпирам зад луѓето, зад ова движење и мојата цел на овие избори е само институционално да ја насочам енергијата на отпорот, движењето на отпорот што е создадено во Чаир, да го предводам референдумот, референдумот што ќе се одржи во Чаир на 19 октомври“,
кажа тој.
Ја обвини владата дека со своите напади кон него, всушност, се обидува да ја прикрие својата нефункционалност и неуспех да и обезбеди европска иднина на државата.
Претходно Османи изјави дека од владејачката ВМРО-ДПМНЕ преку приватни канали добиваат пораки за затоплување на односите со Демократската унија за интеграција (ДУИ).