Поради продлабочената буџетска дупка во Фондот за ПИОМ, како што вели тој, во неизвеснот се ставени не само исплатите на сегашните, туку и на идните пензионери
„Затоа му порачувам и на премиерот Мицкоски и на власта, престанете да напаѓате, се препелкате во сопствена кал. Хаосот се должи само како резултат на вашата неспособност, на немањето капацитет и немање желба вистински како што треба да се води државата, на немањето грижа вистинска за граѓаните, за работниците, за пензионерите, за нивниот стандард“, порача Филипче
Владата и нејзините лоши политики направија хаос во пензискиот систем со што во ризик ја доведе нивната редовна исплата во следните месеци. Ова на денешната прес-конференција, што во најголем дел беше посветена на економските и социјалните проблеми, го рече лидерот на Социјалдемократскиот сојуз (СДСМ), Венко Филипче, посочувајќи дека премиерот Христијан Мицкоски се обидува со лаги и манипулации, вината за хаосот што тој го направи во пензискиот фонд да ја препише на опозицијата.
„Велат дека СДСМ сака преку судството да ги намали пензиите на пензионерите. Ваква лага одамна не сме слушнале. Сакам јасно да им порачам на пензионерите дека хаосот што се случува во пензискиот систем, нестабилноста на пензискиот фонд, неизвесноста дали воопшто ќе има исплата на редовни пензии во следните месееци, се резултат на лошите политики, на лагите и манипулациите на премиерот Мицкоски и владата на ВМРО-ДПМНЕ, ЗНАМ и ВЛЕН“,
рече тој.
Според него, опозицијата повеќепати предупредуваше дека е пореебно власта да се придржува до законското решение донесено во времето на СДСМ, кое предвидува правично зголемување на пензиите и одржливост на Фондот за пензиско осигурување (ПИОМ).
Посочи дека таквото законско решение е логично оти обезбедува доволно сума на пари за континуирано зголемување на пензиите согласно зголемувањето на трошиците за живот, согласно растот на минималната плата и согласно инфлацијата.
„Ние направивме 50 отсто усогласување со инфлацијата, 50 отсто усогласување со платите. А Владата донесе несоодветно решение. Ќе видиме сега, според одлуката на Уставниот суд, многу веројатно противуставно решение“,
кажа лидерот на опозицијата.
Доколку власта го продолжеше законското решение на СДСМ, како што додаде, сега над 92 отсто од пензионерите ќе имаа поголемо зголемување од 1 000 денари со решението на владата на Мицкоски.
Поради продлабочената буџетска дупка во Фондот за ПИОМ, како што вели тој, во неизвеснот се ставени не само исплатите на сегашните, туку и на идните пензионери.
Филипче посочи и дека одржливоста на Фондот за ПИОМ е нарушена, а сметката е празна поради долгови кон Фондот за здравствено осигурување и кон приватните друштва.
„Тоа никој не го коментира и се молчи. Од каде сега ќе кратите за да можат да се исплатата пензиите во овој хаос што го создадовте“,
кажа тој.
Според него, дополнително со решението на власта се дискриминирани 12 000 пензионери што живеат во странство.
„Затоа му порачувам и на премиерот Мицкоски и на власта, престанете да напаѓате, се препелкате во сопствена кал. Хаосот се должи само како резултат на вашата неспособност, на немањето капацитет и немање желба вистински како што треба да се води државата, на немањето грижа вистинска за граѓаните, за работниците, за пензионерите, за нивниот стандард“,
вели Филипче.
На денешната преес-конференција, Филипче ја критикуваше власта и за хаосот во енергетскиот сектор и за падот на странските инвестиции.
Посочи дека поради ниското производство, државата купува струја по многу повисоки цени.
„И што следува. Нормално, поскапување на струјата. На новиот тендер за следната година, цената на струјата што ја понудила ЕСМ на ЕВН за домаќинствата расте од 62 на 65 евра. Значи, има раст на цената на струјата, а растот на цената на струјата повлекува раст на сите други цени во државата“,
посочи тој.
За инвестициите рече дека во времето на СДСМ, странските директни инвестиции биле 800 милиони евра, а сега, за девет месеци се околу 200 милиони евра.
Од Фондот на пензиско и инвалидско осигурување на Македонија (ПИОМ) вчера соопштија дека исплатата на пензиите се одвива нормално, односно дека исплатата на ноемвриската пензија ќе започне навреме, на 1 декември, при што ќе бидат исплатени вкупно 9 297 493 427 денари.
Инаку, изминатите денови во јавноста актуелна е вербалната преписка меѓу Уставниот суд и премиерот Христијан Мицкоски.
Тој завчера во Собранието, за време на седницата за пратенички прашања, рече дека Уставниот суд веќе донел одлука за укинување на законската одредба за линеарно зголемување на пензиите и веќе од наредниот месец најголемиот број од пензионерите ќе добиваат помали пензии.
Уставниот суд на 20 ноември соопшти дека е поведена постапка за оценување на уставноста на член 2 од Законот за пензиско и инвалидско осигурување, со кој беше воведено линеарно зголемување на пензиите. Со поведувањето на постапка за оценување на уставноста на оспорениот член, Судот ќе испитува дали законското решение е оправдано и во доволна мера избалансирано.