Пратеникот на ВМРО-ДПМНЕ го обвини СДСМ дека додека бил на власт со поставувањето партиски кадри во Судскиот совет и други важни правосудни институции оваа партија целосно го узурпирала судскиот систем
Претходно денеска потпретседателката на опозициската партија, Ана Чупеска, одржа прес-конференција од која интерпелациите за петтемина членови на Судскиот совет, но и постапката за разрешување на државниот јавен обвинител Љупчо Коцевски ги нарече незаконски, противуставни, насилнички, како и дека претставуваат отворен и пакосен влез на земјава во авторитаризам
Власта и опозицијата еден ден пред седницата на која ќе се расправа за интерпелациите на петтемина членови на Судскиот совет избрани од Собранието ги вкрстија копјата околу ова прашање обвинувајќи се меѓусебе за состојбите во правосудството.
Откако од опозицискиот Социјалдемократски сојуз денеска на прес-конференција обвинија дека утре ќе се случи еден од најголемите упади на извршната во судската власт што е само подготвување терен за инсталирање на послушни и лојални кадри на актуелната власт, со обраќање пред новинарите реагира пратеникот на ВМРО-ДПМНЕ, Драган Ковачки.
Уште на почетокот на прес-конференцијата, тој рече дека СДСМ намерно ги штити судиите и обвинителите за да се избегне одговорност и да се спречи нивна казна за неправилности и корупција.
Според Ковачки, овие практики на опозицијата доведуваат до сериозно нарушување на принципите на правдата и правото, кои, како што кажа, се основните столбови на демократијата и функционирањето на правниот систем.
Во тој контекст, тој го обвини СДСМ дека додека бил на власт со поставувањето партиски кадри во Судскиот совет и други важни правосудни институции оваа партија целосно го узурпирала судскиот систем.
„Ваквиот пристап резултираше со сериозни последици, како што е огромното намалување на довербата на граѓаните во судството, која според истражувањата е само 2 отсто. Народот, гледајќи дека судските одлуки не се донесуваат според правото, туку се водат од политички интереси, губи доверба во правосудниот систем. Ова создава впечаток дека, иако правдата треба да биде на страна на граѓаните, всушност постои заштита за криминалците, особено оние кои се поврзани со СДС“,
рече Ковачки.
Пратеникот на ВМРО-ДПМНЕ директно ја спомена и членката на Судскиот совет, Весна Дамева која е една од петтемина чија интерпелација бара власта, наведувајќи дека додека била претседателка на ова тело ги исполнувала нарачките на поранешниот премиер Зоран Заев и неговиот министер за здравство, а сега лидер на СДСМ, Венко Филипче.
Дополнително, Ковачки кажа дека СДСМ активно борејќи сè да го задржи своето влијание во судството преку, според него, корумпирани судии и обвинители, ја поткопува независноста на судството и го нарушува принципот на еднаквост пред законот.
„Меѓутоа, времето на ваквата контрола и злоупотреба на судската власт мора да заврши. За да се обнови довербата на граѓаните во судството, потребно е да се воспостават механизми кои ќе осигураат дека судиите ќе донесуваат одлуки во согласност со правото, без политички или економски притисоци. Промените треба да се случат на повеќе фронтови, но најважно е да се создаде атмосфера во која правдата нема да биде само на хартија, туку и во практиката. Злоупотребите кои се поврзани со СДС мора да се расветлат, а виновниците да се повикаат на одговорност“,
рече пратеникот на ВМРО-ДПМНЕ.
Претходно денеска потпретседателката на партијата, Ана Чупеска, одржа прес-конференција од која интерпелациите за петтемина членови на Судскиот совет, но и постапката за разрешување на државниот јавен обвинител Љупчо Коцевски ги нарече незаконски, противуставни, насилнички, како и дека претставуваат отворен и пакосен влез на земјава во авторитаризам.
Брзањето со интерпелациите на петтемина членови на Судскиот совет, во услови кога се подготвува нов закон за ова тело, според Чупеска, ги обелоденува вистинските намери на власта, а кои, како што кажа, воопшто не се поврзани со реформските процеси, туку со воспоставување целосна партиска контрола на правосудството.
Интерпелациите на петтемина членови на Судскиот совет на 7 февруари ги поднесоа пратеничките групи на ВМРО-ДПМНЕ, „Вреди“и ЗНАМ, откако претходно кон крајот на минатата година, Собранието не го усвои извештајот за работата на Советот за 2023 година.
Членовите на Судскиот совет за кои се бара интерпелација се Весна Дамева, Тања Чачарова-Илиевска, Муљазим Мустава, Павлина Црвенковска и Селим Адеми.
Бидејќи беа поднесени со потписите на 67 пратеници, повеќе од извесно е дека интерпелациите со сигурност ќе бидат изгласани во Собранието, но и покрај тоа тие нема да значат и разрешување на членовите на Советот по автоматизам. Дали ќе се повлечат или ќе останат на функциите, одлука треба да донесат самите членови на Советот.
Премиерот Христијан Мицкоски, кој уште во предизборието најави „разрешување“ на Судскиот совет, а најавувајќи ги интерпелациите на 6 февруари рече дека почнува „ударот во чело“ на Советот, изјави дека Собранието не може да ги разреши, но оти очекува дека по интерпелациите тие ќе бидат доблесни и самите ќе се повлечат.
Инаку, Судскиот совет освен денеска, своја седница закажа и за утре во исто време кога треба да стартува 40. пленарна седница на Собранието со петте интерпелации на дневен ред.
Прашан дали денешната и за утре закажаната седница на Судски совет се користат како алиби за нивните членови, за кои се бара интерпелација, да не присуствуваат на седницата на Собранието, претседателот на Советот, Александар Камбовски рече дека немале таква намера.
„Апсолутно не. Немаше никаква намера. Ние кога се закажуваше нашата седница не ни знаевме дека ќе биде на иста дата и собраниската седница. Нашава седница воопшто не е пречка таа да биде одржана, и обратно, собраниската, пак, да биде пречка нашава да се одржи. Доколку некој од колегите изрази желба да отиде таму и да даде изјава, ние тука ќе ја прекинеме седницата и ќе почекаме да се врати. Значи нема да има никаква пречка ниту во Собрание, ниту во Судскиот совет“,
рече Камбовски одговарајќи на новинарско прашање пред почетокот на денешната седница на Судскиот совет.
Прашан за евентуални оставки од страна на членовите на Советот чии интерпелации се бараат, Камбовски кажа дека тоа е личен чин.
„Не знам, тоа е личен чин, индивидуална одлука. Не можам јас, ниту очекувам, ниту не очекувам. Не знам како ќе се одлучат колегите“,
рече Камбовски.