Професорот Владо Поповски, како советник на поранешниот претседател Борис Трајковски, се обрати на свечена дебата во МАНУ за современата македонската држава
Претседателот Борис Трајковски е првиот кој сите граѓани и сите политички партии, верски, традиционални старешини го признаа за свој претседател, за претседател на сите граѓани, независно од етничката и националната припадност, беше претседател кому му веруваа и очекуваа да ги промени на подобро работите во Република Македонија.
Вака професорот Владо Поповски, советник во кабинетот на поранешниот претседател, зборуваше за улогата на Трајковски за македонска држава на денешниот свечен научен собир во МАНУ на тема „Современата македонска држава – две етапи во процесот на нејзиното формирање и развој 1941-1991/1991-2021“.
Поповски зборуваше за Трајковски како претседател кој во својот мандат успеал да седне и да разговара со сите, и од македонската и од албанска страна, и да одигра важна улога на почетокот на 2000-тите години.
„Претседателот Трајковски во јуни 2001 пред Собранието на Република Македонија објасни дека Република Македонија мора да се држи до сразмерен одговор на паравоените структури, кои претседателот веруваше дека се борат за територии, за рушење на македонската држава или за поделба, укажувајќи дека мора да се држи до сразмерен одговор бидејќи во тие паравоени структури има многу млади Албанци од Македонија и на еден начин кај постарите генерации можеа тие да добијат поголема поддршка и авторитет. Објаснувањето на Трајковски беше во тоа дека тие млади генерации и постарите според третманот, почнувајќи од 50-тите години, особено со одлуките во 1989 година, имаа апсолутно дискриминирана позиција во Македонија, немаа еднакви права со Македонците, а податоците беа фрапантни во следната смисла: на пример, од сите млади генерации кои завршуваа осумгодишно образование, а опфатот беше релативно низок – околу 65 проценти, само 5-6 проценти од нив запишуваа средно образование до 1991 година. Од 1991 до 2001 само 7 отсто запишуваа средно образование“,
зборуваше Поповски.
Во неговиот мандат, во ситуација кога затекна меѓуетнички расцеп, Поповски рече дека Трајковски влегол во сите структури – и македонски и албански, разговарал со сите и имал поинаков пристап.
„Ги сослуша сите, нивните маки, особено тежината на бесперспективност и се втопи како еден од нив, свој меѓу своите сограѓани. Поттикна активност на промена на работите, го отвори процесот на расправа на 4 релевантни партии во Македонија, двете најголеми македонски и двете најголеми албански партии, со задача да ги разгледаат сите проблеми, да предложат нивно решение, програма и активности. Меѓутоа, паравоените структури веќе притискаа, па од тие причини побара помош од САД и ЕУ да помогнат во продолжувањето на дијалогот со сите Албанци“,
рече професорот Поповски.
Трајковски, зборуваше неговиот советник, објасни дека младите Албанците гледаат без перспектива на својот живот и развој тука и затоа сметаше дека треба да се има друг пристап.
Според Поповски, тој бил претседател кој станал пријател и близок соговорник со сите раководители на соседните земји, а искрено и пријателски бил прифатен и од Жак Ширак, и од Путин, и од Буш, и од Клинтон…
Пред Поповски се обрати Живко Кондев, шеф на кабинетот на првиот претседател на државата, Киро Глигоров.
На настанот ќе се обратат и поранешните претседатели Бранко Црвенковски и Ѓорге Иванов, како и актуелниот шеф на државата, Стево Пендаровски.