Соработката со Антонијо Милошоски, премиерот ја оцени на највисоко ниво и посочи дека е еден од најблиските луѓе околу него, а за министерот за правда кажа дека знае каква состојба затекнал во Министерството за правда и оти секој ден се координираат и соработуваат во делот на реформите во правосудството
Прашан дали има проблем со коалицијата „Вреди“, по наводите што во интервјуто за „360 степени“ ги изнесе министерот за здравство, Арбен Таравари, премиерот категорично одговори дека нема такво чувство и дека напротив имаат исклучително квалитетна соработка
Владината коалиција е стабилна и ја има поддршката од 78 пратеници во Собранието, уверува премиерот Христијан Мицкоски.
Премиерот ги изнесе смирувачките тонови одговарајќи на новинарски прашања во врска со меѓусебните дискредитации што јавно си ги упатија пратеникот и функционер во ВМРО-ДПМНЕ, Антонијо Милошоски и министерот за правда Игор Филков, кој доаѓа од редовите на коалицискиот партнер ЗНАМ, како и неусогласените ставови за одредени прашања кај третиот владин партнер ВЛЕН, а за кои во интервју за „360 степени“ проговори министерот за здравство и еден од лидерите на коалицијата, Арбен Таравари.
Кавгата меѓу Милошоски и министерот за правда, премиерот ја припиша на „лошиот ден“, кој, како што рече, верува дека и на двајцата им завршил.
Соработката со Антонијо Милошоски ја оцени на највисоко ниво и посочи дека е еден од неговите најблиски соработници.
„Пратеникот Антонијо Милошоски е член на Извршниот комитет на партијата, тој е дел од мојот најблизок периметар. Јас соработката со Антонијо Милошоски ја оценувам на највисоко ниво, тој е додадена вредност и во рамките на пратеничката група и во рамките на партијата со своето искуство“,
рече премиерот.
Тој со позитивен тон се осврна и на работата на министерот за правда за кого рече дека знае со какви проблеми се соочил и каква состојба затекнал во Министерството.
„Континуирано на дневна основа можам да кажам дека се координираме и соработуваме во делот на реформите кои се многу важни, особено во секторот правда. Но, она што можев да го заклучам, а убеден сум дека сето ова ќе застане на овие два лични ставови, е дека секој има право на лош ден, па така ја мислам дека тој лош ден и за едниот и за другиот завршил“,
рече Мицкоски одговарајќи на новинарски прашања по денешната посета на Технолошко-индустриската развојна зона (ТИРЗ) Штип.
На дополнително прашање, во истиот контекст, односно дали има проблем со коалицијата „Вреди“, премиерот категорично одговори дека нема такво чувство и дека напротив имаат исклучително квалитетна соработка.
Граѓаните да бидат сигурно владината е стабилна. Повеќе од две третини неофицијално, а официјално 78 пратеници ја поддржуваат оваа влада. Граѓаните според она што го гледам од анкетите даваат поддршка, огромно е позитивното мислење дека и Македонија се движи во позитивна насока и тоа за нас претставува инспирација да продолжиме и понатаму да се движиме и да работиме“,
рече премиерот.
За потсетување, пратеникот од ВМРО-ДПМНЕ, Антонијо Милошоски, оценувајќи ја работата на министерот Игор Филков, кој е од редовите на владиниот партнер на ВМРО-ДПМНЕ, партијата ЗНАМ – За Наша Македонија, рече дека тој има слаби перформанси во однос на обврските коишто ги има преземено за реформите во правосудството.
На забелешките на Милошоски, изнесени во гостување во „Топ Тема“, со остра реакција на социјалните мрежи излезе прозваниот Филков, кој за пратеникот на ВМРО-ДПМНЕ напиша дека уште откако се повлекол од функцијата министер за надворешни работи, како пратеник, активно учествуваше во креирањето на канцерогениот правосуден систем, а, како што наведе бил вклучен и во донесувањето на штетните измени во Кривичниот законик во 2023 година, со што се спасил од одговорност за кривичното дело „Моќник“.
Филков во објавата, Милошоски го нарече „кусурот на Груевски, познат под прекарот Џуџето од Небрегово“, кого, како што напиша, „јавноста го памети по аферите поврзани со АМСМ и семејните бизниси од Кичево, а кој во минатото бил познат и по Ванчо Михајловистички ставови.
Во однос на обвинувањата од Милошоски за доцнењето на реформските закони во правосудството, Филков наведе дека пратеникот „очигледно е неинформиран и изолиран од партијата“.
Критиката на Милошоски кон Филков дојде еден ден откако министерот за здравство и лидер на Алијанса за Албанците, дел од владината коалиција „Вреди“, Арбен Таравари, во интервју за „360 степени“ изјави дека од 100 километри се гледа неусогласеноста на „Вреди“ во владината коалиција.
Таравари, исто така, рече дека има контакти со ДУИ и дека такви контакти имале и лидерите на другите партии од „Вреди“.
Од Беса, Алтернатива и Демократско движење преку писмени соопштенија ги негираа овие наводи на лидерот на четвртиот партнер во таборот.