„Она што е значајно да се спомене е дека нема потреба од никаква паника, ниту од избрзани реакции и заклучоци. Станува збор за нешто долго најавувано од оваа администрација, и не е одмината ниту една земја – дури ни најстарите и најтрадиционални партнери на САД“, се вели во соопштението од Владата
Воведените царини од администрацијата на американскиот претседател Доналд Трамп, кои не ја одминаа ниту С Македонија, според Владата биле очекувана одлука, која, како што велат оттаму, нема да има големо влијание врз нашата економија.
Во врска со царините, кои денеска се тема број еден во светот, од Владата се огласија преку писмено соопштение, во кое се вели дека нејзините тимови „веќе некое време ги анализираат можните последици“ и оти заедно имаат подготвен план за надминување на ситуацијата.
„За нас станува збор за очекувана одлука на американската администрација, која не ја одмина ниту една земја во светот – дури ни Велика Британија, Канада, Европската Унија и уште стотици други држави… Оваа одлука нема да има голем импакт врз нашата економија, но ние имаме јасен план како понатаму“,
се вели во соопштението.
Од „Илинденска“ број 2 наведуваат дека контактите со американската администрација се веќе воспоставени и ќе продолжат на високо ниво, а „Владата ќе работи на изнаоѓање решение и спроведување на планот“.
„Она што е значајно да се спомене е дека нема потреба од никаква паника, ниту од избрзани реакции и заклучоци. Станува збор за нешто долго најавувано од оваа администрација, и не е одмината ниту една земја – дури ни најстарите и најтрадиционални партнери на САД“,
се додава во соопштението од Владата.
Во врска со одлуката на администрацијата на претседателот Трамп, од македонската влада велат дека станува збор за обид за репреговарање на трговските односи во светот.
Ова од извршната власт во земјава го оценуваат како нешто што било неопходно и кое, „иако сега за некои претставува шок, за други ќе значи можност.
„Знаеме дека оваа ситуација е шанса за многу луѓе кои не ѝ посакуваат добро на Владата да напаѓаат неосновано и да се обидуваат да нанесуваат штета врз нашиот углед, било поради лични интереси, било поради партиски цели, било поради малодушност. А некои и поради оправдани дилеми, и нив целосно ги разбираме. Нападите што ги слушаме од првата група споменати не се ништо ново. Очекувани се, и тие не знаат ништо подобро од тоа. Но ние ќе ги преживееме и нивните напади, и ќе бидеме посилни, ќе се уверите во тоа“,
велат од Владата.
Американскиот претседател Трамп на земјава ѝ воведе царински давачки од 33 проценти, што е половина од 65 проценти македонски царини за американски производи увезени во државата, што ги пресметала администрацијата во САД.
Македонија е една од земјите за чии производи што ги извезува во САД се одредени највисоки царини, во она што во светски рамки се оценува како „тежок удар за глобалната економија“, од едни, или „објава на трговска војна“, од други страни.
На воведените царини реагираа од Европската Унија, за која тарифите се одредени на 20 отсто, додека на производите кои доаѓаат во САД од втората економија во светот, Кина, ѝ се воведени нови царински давачки од 34 проценти.
Од регионот, според табелите што синоќа ги објави Трамп, со повисоки царини се Босна и Херцеговина со 35 и Србија со 37 отсто. Косово, Албанија и Црна Гора, пак, поминаа со зголемување на царинските давачки за 10 отсто.