Владата во моментов одржува седница на која се разгледуваат препораките на Комисијата за заразни болести за затворање на сите градинки, основни и средни училишта и факултети во земјава, почнувајќи од утре, па во наредните 14 дена.
По седницата, најавена е прес-конференција на министерот за здравство Венко Филипче на која се очекува да ги соопшти одлуките на Владата. Според последните информации, пресот на Филипче ќе биде во 14:30 часот, а ќе биде достапен во живо на веб-страницата 360stepeni.mk
Исто така, Комисијата препорачува забрана на сите масовни собири на отворено и на затворено, а сите спортски собири да се одржуваат без публика. Се воведува задолжителна самоизолација за сите лица што доаѓаат од високо и средноризични држави во период од 14 дена.
Се препорачува и забрана за извоз на медицинска опрема, медицински средства и материјали од економски оператори од земјава, освен со посебна дозвола од Министерството за здравство.
За позрасните и поризичните категории граѓани со хронични болести се сугерира да го ограничат движењето и да го избегнуваат јавниот превоз.
Исто така, се препорачува Владата да забрани патување во земји што се од висок и среден ризик, а листата на овие земји ќе биде поставена на веб-страницата на Министерството за здравство и ќе биде секојдневно ажурирана.
Комисијата, исто така, препорачува вработените во здравствените установи кои се ангажирани во изборниот процес да бидат изземени од натамошно учество и да бидат заменети со други лица.
За тие што нема да ги почитуваат и ќе ги прекршат препораките, Комисијата истакнува дека ќе бидат казнети по член 205 и 206 од Кривичниот законик.
Се бара да се воведе т.н. „хелт локатор картичка“ за сите летови и компании.