Министерот за животна средина смета дека со усвојувањето на ваков предлог-закон ќе се овозможи не само заштита на природните вредности, разновидноста на биодиверзитетот, туку и ќе се создадат нови можности за одржливо управување и развој на овој екосистем
Кањонот Матка наскоро се очекува и законски да биде прогласен за споменик на природата.
Владата на денешната седница усвоила предлог-закон за негово прогласување за заштитено подрачје во трета категорија – споменик на природата.
Сега на потег се пратениците бидејќи од Илинденска бр. 2 предлог-законот ќе биде испратен во собраниска процедура.
„Со конечното усвојување, после долг период на усогласување, постигнат е консензус во интерес на заштита на ова уникатно национално природно богатство. Со донесувањето на законот ќе се овозможи не само заштита на природните вредности, разновидноста на биодиверзитетот, туку и ќе се создадат нови можности за одржливо управување и развој на овој екосистем“,
информира министерот за животна средина Насер Нуредини.
Предлогот кањонот Матка да биде споменик на природата кон Министерството за животна средина и просторно планирање беше испратен пред повеќе од две години.
На 9 декември 2020 година тогашниот состав на Советот на Град Скопје го прифати предлог – „за“ гласаа и советниците од СДСМ и од ВМРО-ДПМНЕ, по што беше испратен до Министерството.