Исклучување на декоративното осветлување на фасадите на јавните објекти и културните споменици, гаснење сијалици кога има доволно дневна светлина, во сезона на ладење клима-уредите да се местат не пониско од 27 степени, а во сезона на греење не повисоко од 20 степени, редовно да се менуваат филтрите, а прозорците во канцелариите да се заменат со енергетски ефикасни, се дел од задолженијата на Владата за државните институции, кои денеска ги презентираше министерот за економија Кршеник Бектеши. Како што објасни Бектеши, целта на мерките е заштеда на електрична енергија.
„Пред нас е една од најтешките зими на енергетски план, не само за нас, туку и за сите земји во регионот, како и во Европа. За полесно да се справиме со она што не очекува, за непречено снабдување со електрична енергија, рационално трошење и пониски сметки, подготвивме план и препораки за заштеда на струја. Мерките се поделени во повеќе категории, зависно дали се работи за домаќинства, компании или објекти, институции и претрпијатија во државна сопственост. Целта е намалување на потрошувачката за 15 отсто споредено со истиот месец лани. Ако не се постигне оваа цел, ќе следуваат согласно етичкиот кодекс и сите уредби, одредени санкции за сите раководители на институциите“
рече Бектеши.
За реализација на мерките секоја државна инстиуција ќе треба да обезбеди лице кое ќе се грижи за почитување на новите правила, а таму каде што нема да се почитуваат ќе има санкции. Дел од мерките ги опфаќаат и јавните претрпијатија , па според владините препораки ќе се намлува и осветлувањето на патиштата, улиците и плоштадите.
За државните институции мерките се задолжителни, додека за компаниите, бизнис секторот и домаќинствата , како и за општините и претпријатијата под надлежност на локалната власт, ќе бидат само препораки на Владата.
Мерките стапуваат на сила од 1 септември , а ќе траат до 31 март 2022 година.