Посебна вредност на оваа конференција, како што рече портпаролката, ќе биде присуството на 37 лекари и медицински експерти од странство, што во најтешките денови по трагедијата во Кочани директно учествуваа во лекувањето на пациентите. Во Скопје ќе пристигнат доктори од клиники и здравствени центри од повеќе европски земји, односно токму од оние институции кои ги отворија своите врати кога на Македонија ѝ беше најпотребно
Во организација на Владата, в сабота на 14 март ќе се одржи Меѓународна конференција насловена како „Институционални и клинички аспекти и решенија по пожарот во Кочани една година потоа“ посветена на едногодишнината од трагедијата во Кочани, во која загинаа 63 лица, а повеќе од 200 беа повредени, информира на денешната прес-конференција владината портпаролка Марија Митева.
Целта на оваа конференција, како што рече, е да се направи една сеопфатна анализа на одговорот на трагедијата, од првичната интервенција и спасувањето животи, до долгорочниот третман, рехабилитација и системските решенија за подобра подготвеност при кризни ситуации. Таа ќе обедини претставници на институциите, здравствени експерти, меѓународни организации и хуманитарни партнери.
„Пред нас, за жал, е одбележувањето на годишнината од трагедијата во Кочани, настан што и тогаш, како и денеска го буди истото чувство на болка и длабока одговорност. Тоа беше ден кога времето застана за многу семејства, но истовремено, тоа беше момент кој ја покажа силата на солидарноста. Во најтешките часови се мобилизираа здравствените работи, институциите, службите, локалната заедница. Државата реагираше, а и нашите партнери покажаа дека солидарноста не е само принцип, туку конкретна поддршка кога е најпотребна“,
рече таа.
Според неа, во тие часови, благодарение на координативниот одговор од страна на државата и поддршката од европските и регионалните здравствени системи, се спасени човечки животи и е обезбеден третман за најтешко повредените.
„За Владата една година подоцна, целта не е само сеќавање, туку да покажеме одговорност и создавање систем што ќе биде уште посилен, поорганизиран и поподготвен да одговори на кризни ситуации“,
вели Митева.
Посебна вредност на оваа конференција, како што рече портпаролката, ќе биде присуството на 37 лекари и медицински експерти од странство, што во најтешките денови по трагедијата во Кочани директно учествуваа во лекувањето на пациентите.
„Во Скопје ќе пристигнат доктори од Клиники и здравствени центри од повеќе европски земји, токму од оние институции кои ги отворија своите врати кога на Македонија ѝ беше најпотребно. Ќе имаме претставници од Србија, Бугарија, Грција, Хрватска, Словенија, Полска, Австраја, Латвија, Шветска, Литванија итн. Нивното присуство на оваа конференција претставува можност искуствата од заедничката работа да се претворат во знаење, но и системски решенија за подобра подготвеност на здравствените системи во иднина“,
кажа портпаролката.
Конференцијата ќе започне со свечено институционално отворање, по што ќе следи и комеморативен момент, како потсетник дека зад секоја трагедија стојат човечки приказни.
„Во текот на конференцијата ќе се одржат и повеќе тематски панели, посветени на повеќе аспекти“,
вели таа.
Владата, како што додаде, останува доследна на ветувањето, дека поддршката на жртвите, повредените, нивните семејства, но и за здравствениот систем нема да биде еднократна, туку континуирана и системска.
„Уште од првиот ден е преземена обврската дека државата ќе стои зад процесот на лекување, рехабилитација и закрепнување на повредените, како и дека трагедијата ќе биде претворена во поттик за подобрување на институционалните капацитети и подготвеноста на системот“,
кажа Митева.
Ветувањето, како што рече таа, и денес се реализира преку конкретни мерки, соработки со домашни и меѓународни партнери и постојано унапредување на здравствените и кризно-менаџерските механизми.