Когенеративната постојка се очекува да произведува годишно околу 1 150 гигавати електрична и 267 гигавати топлонска енергија
Владата одлучи да додели статус на стратешка инвестиција на компанијата „Митилионеос“ ДООЕЛ Скопје чија вредност се проценува 211 милиони евра. Станува збор за реализација на проектот „Митилионеос – Когенеративна постројка Скопје“ кој предвидува изградба на постројка за електрична и топлинска енергија.
„Вредноста на инвестицијата се предвидува да биде 211 милиони евра и според предвиденото, се состои од постројка за електрична енергија (со моќност 90-105 мегават) и топлинска енергија (со моќност од 135-150 мегавати). Годишното производство на електрична енергија се очекува да изнесува околу 1 150 гигавати и околу 275 гигавати топлинска енергија, коишто, се очекува да бидат испорачани во соодветните енергетски системи – МЕПСО и системот за пренос на топлина на Град Скопје“,
соопштија од Владата.
Одлуката е донесена согласно Законот за стратешки инвестиции, а по јавен повик за поднесување барање за утврдување стратешки инвестициски проект кој беше објавен на 31 јануари годинава.
Од Владата додаваат дека донесената одлука е во насока на нејзините определби за создавање услови за зголемување на домашното производство на електрична и топлинска енергија.