Владата на седница вечерва одлучи да забрани летови до земјава од Велика Британија и Северна Ирска до крајот на 2020 година, по појавата на нова мутација на коронавирусот.
Одлуката ја донесе Владата врз основа на препорака на Комисијата за заразни болести. Мерката претходно веќе ја најави и премиерот Зоран Заев, по седницата на Главниот кризен штаб.
Исто така, задолжителен ќе биде и карантин за оние кои доаѓаат од овие земји.
„Со оваа одлука на Владата ќе биде задолжителна проверка на сите патници кои влегуваат на територијата на Северна Македонија од Велика Британија и Северна Ирска преку копнен граничен премин и на граничните премини на аеродромите во Скопје и Охрид и сите ќе бидат задолжително упатени во самоизолација од 14 дена, како и да пополнат пријава за влез во државата со податоци за местото на сместување“,
соопштија од Владата.