Од утре се укинува полицискиот час, а од четврток, 28 мај, отпочнуваат со работа угостителските објекти со протокол за работа на терасите, а работата во затворените делови ќе се регулира во наредната фаза, одлучи Владата на денешната седница.
Како што соопшти премиерот Оливер Спасовски, на прес-конференција, на денешната владина седница се донесени повеќе важни одлуки со кои се укинуваат дел од мерките кои беа воведени за борба против ширењето на коронавирусот.
Освен укинувањето на полицискиот час и одлуката за отворање на угостителските објекти, Владата одлучи од 1 јуни да престанат да важат ослободувањата од работа, работата од дома, како и организирањето на работата со ротации. Ова укинување ќе биде проследено со соодветен протокол за работа во просторните услови, како и за личната заштитна опрема.
„Ова нема да важи за хронично болните, отстапка ќе има и за родители со деца до 10 или родителите со деца во претшколска возраст“,
рече Спасовски.
Се менува и протоколот при влез во земјава за наши државјани кои доаѓаат од странство. Наместо задолжителен карантин, тие ќе треба да бидат во домашна изолација.
„Се укинува задолжителниот карантин за наши граѓани кои доаѓаат во земјава преку хуманитарните летови или конвои, а се воведува домашна изолација, но со приложен негативен ПЦР тест, направен 72 часа пред влезот во земјата“,
додаде Спасовски.
Оние, пак, кои се во моментов во државен карантин, може на свој трошок да направат ПЦР тест и доколку тој биде негативен, да им се укине државниот карантин.
Спасовски рече дека вирусот е сè уште присутен и задолжително е да се почитуваат мерките за лична заштита и одржување на растојание. Тој рече дека зголемениот број на новозаболени случаи е јасно од каде се, алудирајќи на семејни собори и непочитувањето на дел од мерките.
„Ќе има нагласена примена на мерките кон овие нови жаришта. Капацитетите и знаењето на здравствените работници достигнаа висока стручност и тоа ни дава за право да заклучиме дека здравствениот систем може да одговори на предизвиците. Успешно го амортизиравме првиот удар од епидемијата и во ниту еден случај не се оптовари здравствениот систем. Вирусот е тука и ќе биде присутен додека не се стекне имунитет или додека не се најде вакцина. Важно е граѓаните да се придржуваат до мерките, за лична заштита и држење растојание. Да живееме со коронавирусот на начин на кој ќе бидеме заштитени и ќе го штитиме здравјето на сите околу нас“,
додаде Спасовски.