Владата објави список со 55 лица ангажирани со авторски договори од 1 јануари 2021 година, а БИРН јави за 58 исплатени фактури (за исто толку хонорарци) за декември 2020 година, чии имиња владиниот кабинет одби да ги објави
Највисокиот месечен надоместок изнесува 60 000 денари, а најнискиот – 14 500 денари
Вкупно 55 лица се на владиниот список на хонорарци со авторски договори за тековната 2021 година. Владата попладнево објави список на ангажираните лица, со висина на хонорарот и опис на ангажманот.
Објавувањето на листата следува по новинарското истражување на „Призма“ (БИРН), но тоа што е различно со наводите во текстот на БИРН, е бројот на хонорарци и периодот (месеците) на нивен ангажман. Владата објави список со 55 лица ангажирани со авторски договори од 1 јануари 2021 година, а БИРН јави за 58 исплатени фактури (за исто толку хонорарци) за декември 2020 година, чии имиња владиниот кабинет одби да ги објави. Дополнително, еден од 55-темина ангажирани не зема надомест, па логично е дека за него нема ни фактура, така што разликата меѓу декември 2020 и актуелната состојба е четири лица, чии имиња засега остануваат непознати.
Може да се забележи дека на листата за 2021 г. нема советник за борба против ковид-19 како што имало во 2020 година, а значаен дел од хонорарците се ангажирани за потребите на прес-центарот и односите со јавноста, како што се: фотографирање, подготовка на податоци за потребите на портпаролот, за дигитални и социјални медиумите, медиа мониторинг, монтажа на видеозаписи…
Според листата, највисокиот месечен надоместок изнесува 60 000 денари, а во описот на ангажираното лице пишува: „Анализа на информации и податоци за изготвување извештаи со елаборирање – Претседател на ИКТ совет“.
Втор по висината е хонорар од 53 000 денари, за ангажман за „координација на активностите поврзани со регионалната економска интеграција на Република Северна Македонија (ШЕРПАС) со позиција – национален координатор за МАП и РЕА, како и поддршка на активностите на тимот за скрининг и преговори“.
Лицето кое не зема надомест е задолжено за анализа на информации и податоци за изготвување на извештај со елаборирање од областа на енергетиката.
Најнизок хонорар од 14 500 денари, според списокот, зема толкувач на знаковниот јазик на прес-конференциите.
Од Владата велат дека досега не ги објавувале имињата за да го заштитат интегритетот и приватноста на ангажираните лица.
„Внимателноста со која Владата постапи во овој случај, со вклучување на дополнителни консултации пред објавувањето на листата хонорарни соработници, беше мотивирана исклучително заради заштитата на интегритетот и приватноста на ангажираните лица. Во минатото сведочевме голем број организирани напади полни дезинформации, а дури и сега во конкретниот случај, сведочиме хајки преку одделни веб-портали и медиуми и на социјалните мрежи на лична основа и со обиди за загрозување на приватноста на граѓаните кои имаат чисти професионални договори за извршување задачи за Владата за поддршка на активностите кои се од интерес на граѓаните. Во таа насока, упатуваме јасна порака дека Владата и институциите ќе ги искористат сите институционални механизми кои се на располагање да ги заштитат професионално ангажираните лица од јавен линч, нарушување приватност, говор на омраза или повици за насилство“,
велат од Владата.
Список може да го погледнете овде.