Комплексот „Македонско село“ е затворен шеста година откако од него се откажа концесионерот поради финансиски загуби. За тој период, СОЗР ги подмируваше трошоците за осигурување и обезбедување на објектот
Владата денеска објави оглас за изнајмување на комплексот „Македонско село“, кој се наоѓа во скопско Нерези, на падините на Водно, со цел повторно да почне да работи и со тоа да се врати на културната и туристичка мапа на државата, информираат од владината Служба за општи и заеднички работи (СОЗР).
Предвидено е комплексот да се издаде на идните закупци на 15 години, а јавното наддавање ќе се одржи на 14 февруари годинава.
Според огласот, комплексот е поделен на четири целини и за сите одделно ќе има јавно наддавање. Почетната цена за закупнина на целиот комплекс изнесува 240 илјади денари, а почетна цена на концесијата на поединечните делови е 44 529 денари, 49 868 денари, 54 839 денари и 91 575 денари.
„Изборот ќе се врши по пат на електронско наддавање, преку системот со кој управува и оперира Министерството за финансии – Управа за имотноправни работи. Закупецот или закупците ќе имаат обврска да ги преземат сите потребни активности за оспособување на Комплексот за почеток со работа од 1 јуни годинава“,
се вели во соопштението од СОЗР.
Комплексот „Македонско село“ е затворен шеста година откако од него се откажа концесионерот поради финансиски загуби. За тој период, СОЗР ги подмируваше трошоците за осигурување и обезбедување на објектот.
Изградбата на овој комплекс почна во 2011 година, а официјално беше пуштен во употреба во јуни 2016 година. Се состои од 12 автентични куќи, а секоја од нив претставува различен регион од државата, со простории каде што се претставени македонските занаети, делови што се користеле како хотелски соби, а некои имаат и ресторански дел.
Директорот на владината Служба за општи и заеднички работи (СОЗР), Ивица Томовски, во интервју за „360 степени“ најави дека ќе се објави оглас за избор на концесионер на комплексот „Македонско село“.
Посочи дека од 2019 година досега комплексот не функционира, а со самото тоа државата изгубила над 20 милиони денари за обезбедување и осигурување на објектот, како и за неплатени кирии.
Рече дека сега има многу заинтересирани да стопанисуваат со комплексот.
„Сметам дека може да биде профитабилен комплексот и претпоставувам дека затоа е и таква заинтересираноста. Она што ние како држава го правиме во моментов е проценка на тој имот. Нема да го издадеме како јавно-приватно партнерство како што тоа било во минатото – ние да одржуваме дел, а дел економскиот оператор. Практично, му даваме клуч на економскиот оператор со нашата замисла и тој стопанисува комплетно и целосно со тој објект“,
рече тој.
Според директорот на СОЗР, почетната цена за издавање би била 240 илјади денари (околу четири илјади евра), а во зависност од конкуренцијата таа сума може да порасне.
„Може и еден да конкурира на сите, може и еден човек да ги земе сите. Може повеќе луѓе да се измешаат. Ако мене ме прашате, подобро би било повеќе, ќе се борат, ќе се натпреваруваат, ќе го заживеат побрзо комплексот ‘Македонско село’ и намерно ми е предвидено еден дел да бидат само ресторани, другите да бидат за сместувачки капацитети, бидејќи не мора да значи дека ако еден човек е добар угостител, може да биде и добар хотелиер или обратно. Затоа одлучивме да одиме на тој начин. Се надевам дека ќе има поголема конкуренција и мислам дека ќе заживее“,
кажа Томовски.