Под слоганот „Штедиме заедно денес за да имаме утре“, Владата најави дека ќе ги едуцира и мотивира граѓаните како поефикасно да ја користат електричната енергија и на тој начин да штедат
Преку информативно-едукативни активности Владата од денеска ќе ги едуцира и мотивира граѓаните да штедат електрична енергија. Под слоганот „Штедиме заедно денес за да имаме утре“, ќе бидат презентирани информации како граѓаните поефикасно да ја користат електричната енергија и на тој начин да штедат.
„Енергетски ефикасните светилки заштедуваат и до 90 проценти електрична енергија. Одржувањето на температурата на 22 степени, наместо на 25 степени, заштедува до 10 проценти електрична енергија. Краткото туширање заштедува вода, струја и пари на вашата сметка“,
рече портпаролот на Владата Душко Арсовски наведувајќи примери со кои преку едукативните активности планираат да поттикнат штедење струја.
Доколку се почитуваат овие и други препораки, додаде Арсовски, може да се заштеди струја и до 50 отсто.
Порака за штедење упати и владиниот соработник за енергетика Виктор Андонов. Тој истакна дека во овој процес се многу важни граѓаните, институциите и компаниите, а дека секој треба да направи мала промена во домот или на работното место кое ќе значи многу за енергетскиот систем.
Владата претходно донесе за штедење со конкретни насоки за сите органи на државната управа. Мерките започнаа на 1 септември годинава, а предвидено е да траат до 31 март следната година. Државните институции кои почнаа да ги применуваат мерките за штедење објавија дека од први септември заштедиле 20 отсто електрична енергија.