Со оваа мерка, објаснува премиерот, Владата се стреми кон подобрување на ефикасноста во управувањето со здравствените установи, намалување на административните трошоци и насочување на средствата кон подобрување на здравствените услуги
После долги години злоупотреби и партиски манипулации, Владата на денешната седница ќе ги разгледува измените на предлог-законот за здравствената заштита, со што ќе се укине институцијата економски директори во јавните здравствени установи, најави премиерот Христијан Мицкоски на својот фејсбук-профил.
Како што објасни тој, со оваа мерка, Владата се стреми кон подобрување на ефикасноста во управувањето со здравствените установи, намалување на административните трошоци и насочување на средствата кон подобрување на здравствените услуги.
„Новите законски одредби предвидуваат дека здравствените домови со над 1 000 вработени, универзитетските клинички центри, универзитетските клиники, клиничките болници и институтите ќе бидат раководени од само еден директор, кој ќе биде одговорен за организацијата и работењето на установата, како и за законитоста на работењето. На овој начин ќе се лоцира и одговорноста и укине дуализмот во одлучувањето. Верувам дека оваа реформа ќе овозможи пренасочување на средствата кон подобрување на здравствените услуги и инфраструктурата, зголемување на транспарентноста и отчетноста во работењето, како и подобрување на условите и квалитетот на здравствените услуги за сите граѓани“,
напиша Мицкоски на Фејсбук.
И од Владата преку соопштение информираа дека на денешната седница ќе биде усвоен новиот закон за изменување и дополнување на Законот за здравствената заштита со кој ќе се укине институцијата економски директори во јавните здравствени установи.
Со оваа реформа, како што се наведува во соопштението, Владата се надева дека ќе ги подобри условите и квалитетот на здравствените услуги за граѓаните овозможувајќи поголема транспарентност и отчетност во работата на здравствените установи.