Доколку Шпанија не успее да го ратификува НАТО протоколот за прием на Северна Македонија во Алијансата до распуштањето на македонскиот парламент, тогаш власта ќе пристапи кон „условна“ ратификација на документот. Според владини извори, тоа е „планот Б“ чија цел е изборниот процес во земјава да не влијае врз одлуката за формален прием на С. Македонија како 30-та земја членка на НАТО.
Условната ратификација, брифираат од Владата, би се изгласала пред распуштањето на Собранието, но би стапила на сила и би се објавила во „Службен весник“ само откако Шпанија ќе го ратификува протоколот. Шпанија е единствениот услов, бидејќи таа земја е последната членка на НАТО која го нема ратификувано протоколот за С. Македонија, поради внатрешната политичка нестабилност и неможноста да се состави Влада.
Во владата, сепак, се уште се надеваат дека ќе помине „планот А“. Доколку Шпанија наскоро добие влада, се очекува ратификацијата на протоколот да помине или до крајот на годинава или во текот на јануари 2020 година.