Во изминатите денови 12 480 компании аплицирале за исплата на плати од државата за април, во висина до 14 500 денари, како мерка што овозможува и враќање на отпуштени работници на старите позиции
Досега 12 480 компании аплицирале за мерката за финансиска поддршка за исплата на платите за април и мај во износ до 14 500 денари месечно по работник со која се овозможува континуитетот на работните процеси, соопшти на денешната прес-конференција советникот на премиерот Фатмир Битиќи.
Тој рече дека од почетокот на кризата до 10 илјади работници се отпуштени, но дека сега е оставен простор за нивно враќање на работните места, наспроти ВМРО-ДПМНЕ од каде што излегуваат со десетпати повисоки бројки на отпуштени и со критика за мерките за справување со економските последици од коронавирусот.
Битиќи оцени дека мерката на Владата е обезбедена основа за редовна исплата на плати и придонеси, со што се создадени и услови да се сочуваат работните места. Но од опозициската ВМРО-ДПМНЕ реагираат дека Владата со вакви мерки стимулирала отпуштање на работници.
„Првичните анкети велат дека над 100 илјади граѓани добиле привремен или конечен отказ. Владата, не само што не стори ништо да го спречи ова црно сценарио, туку и дополнително ги стимулираше фирмите да ги отпуштат своите вработени
реагираа од ВМРО-ДПМНЕ.
менувајќи неколку уредби со сила на закон преку ноќ.
Економските мерки беа најпрво задоцнети, а сега гледаме и дека се далеку од доволни за конечно заживување на македонската економија. Економската состојба од „блескава“ како што тврдеше Заев за само три месеци се претвори во катастрофална, а буџетската дупка од ден во ден е се поголема“,
Битиќи, пак, оценува дека бројката на компании што аплицирале е охрабрувачка, ако се знае дека до крајот на рокот за поднесување барања има уште три дена. Тој уште еднаш ги повика сите компании кои сè уште не аплицирале за оваа финансиска поддршка, да го направат тоа што побргу преку системот за е-даноци на УЈП.
„Апликациите за април треба да се достават најдоцна до 7 мај. Важно е да потсетиме дека Владата овозможи компаниите кои од 11 март до крајот на април отпуштиле одреден број работници сега можат да ги вратат и на тој начин да ги искористат придобивките од оваа мерка. Ова им дава голема шанса на работниците, кои во првиот налет на кризата ги изгубија работните места, да се вратат на претходните работни позиции. Сакам да напоменам дека станува збор за околу 2.000 работници во март и околу 7.000 во април. Тоа е апсолутно далеку од бројката од 100.000 изгубени работни места со која ВМРО-ДПМНЕ манипулира и ја дезинформира јавноста со намера да создаде лажна слика за бројот на отпуштени работници“,
информираше Битиќи.
Бескаматни кредити досега добиле 631 фирма
Советникот на премиерот за економија истакна дека во тек е и спроведувањето на мерките за бескаматни кредити од линиите на Развојната банка, во вкупен износ од 13,7 милиони евра, што ги таргетираат сите микро, мали и средни претпријатија погодени од кризата.
„Од линијата кредити ‘Ковид 1’ досега се одобрени вкупно 631 кредитни апликации за исто толку компании со 5.588 вработени. По структура од вкупно одобрените кредитни апликации, микро компаниите до 10 вработени учествуваат со 76%, малите компании до 50 вработени учествуваат со 22%, а средните компании до 250 учествуваат со 1%. За втората линија бескаматни кредити ‘Ковид 2’, заклучно со вчера се примени 1.260 апликации. Повикот е објавен на 29 април, а ќе трае до 13, вкупно 15 дена. Ги повикувам компаниите да аплицираат и за овие поволни кредити кои ја поддржуваат нивната ликвидност. Наскоро преку комерцијалните банки ќе биде пласирана и линија со исклучително поволни кредити во износ од 51 милион евра“,
истакна Битиќи.
Поголем поврат на ДДВ
Во однос на повратот на ДДВ, тој рече дека од почетокот на годината заклучно со април фирмите добиле поврат од 145 милиони евра. Тоа е за 16,7 проценти повеќе во однос на претходната година. Само за месец април повратот на ДДВ кон компаниите е 38 милиони евра или за 23 отсто повеќе во однос на истиот месец лани. Во однос на 2018 година, повратот на ДДВ за периодот јануари-април е зголемен за 19,4 отсто, а во однос на 2017 година за високи 67,6 отсто, истакна Битиќи.
Тој соопшти дека во тек се преговори со Светска банка за нов проект за брзо дејствување против последиците од кризата предизвикана од ковид-19.
„Проектот е во износ од 90 милиони евра и се состои од две компоненти. Првата се однесува на зајакнување на здравствените капацитети, а втората е за поддршка на домаќинствата и се однесува на обезбедување поддршка за трансфери за ранливи домаќинства и паричен надоместок за оние кои ги изгубиле работните места. За дополнителна поддршка на ранливите семејства е и мерката со која околу 30.000 домаќинства, корисници на социјална помош, добиваат по 1.000 денари енергетски додаток се до септември, односно и надвор од грејната сезона“,
информираше советникот на премиерот.