Во главниот град ќе бидат на располагање 80 од автобусите, а преостанатите 40 ќе бидат распределени во внатрешноста на државата согласно реалните потреби
Владата на денешната седница донесе одлука за набавка на 120 екоавтобуси.
Најголем дел од нив, како што информираат оттаму, се ургентно потребни за обнова на возниот парк на Јавното сообраќајно претпријатие „Скопје“. Во главниот град ќе бидат на располагање 80 од автобусите, а преостанатите 40 ќе бидат распределени во внатрешноста на државата согласно реалните потреби.
„Владата ја разгледа и усвои информацијата од Министерство за транспорт во врска со доставените писма за интерес од единиците на локалната самоуправа за потребата од набавка на еколошки автобуси за јавен превоз. Набавката на екоавтобусите ќе придонесе за подобрување на квалитетот на услугите за граѓаните, како и намалување на загадувањето на воздухот во општините, одржлив развој и заштита на животната средина“,
се наведува во соопштението испратено од владината прес-служба.
Набавката на стотина еколошки автобуси беше најавена од страна на премиерот Христијан Мицкоски во ноември лани, во момент кога ЈСП „Скопје“ два дена беше во целосен колапс поради недостиг на нафта за автобусите. Тој уште тогаш рече дека Владата е во фаза на анализа за набавка од 100 до 120 електрични автобуси заедно со 50-ина полначи, кои ќе бидат распределени во Скопје и во општините каде што има организиран јавен превоз.