Националната стратегија се состои од две фази, првата се однесува на закрепнување од ковид-последиците, додека втората е насочена кон приближување до Стратегијата за вработување на ЕУ
Владата на денешната седница донесе Национална стратегија за вработување 2021-2027 година со вклучен Акциски план.
Според проценките, велат од Владата, стапката на учество на вработените во вкупното население до 2027 година ќе се зголеми на 60 проценти, додека стапката на невработеност ќе опадне на 11 отсто за работоспособното население.
Стратегијата има две фази, од кои првата е закрепнување од ковид-последиците.
„Согласно трендовите на закрепнувањето на економијата и на пазарот на трудот, спроведувањето на Стратегијата е предвидено во две фази, од кои првата е пред сè фокусирана на ублажување на негативните последици на пандемијата од КОВИД-19 врз вработувањето и воведување на потребните реформи за почеток на втората фаза (од 2024 до 2027 година) на политиките, која е попрогресивна и насочена кон приближување до Стратегијата за вработување на Европската Унија“,
соопштија од Владата.
Оттаму потенцираат дека стратегијата е придружена со Гаранцијата за млади, чиј план ќе се преформулира во 2022 година за да се земат предвид напредокот, влијанието на пандемијата врз вработувањето на младите, но и за да се адаптира на програмата на ЕУ за поддршка на млади.