Вицепремиерот Фатмир Битиќи вели дека откако Владата ќе ги слушне сите детали за случајот, фактите веднаш ќе бидат споделени со јавноста – такви какви што се
Денеска се одржа првата владина седница на која премиерот Димитар Ковачевски уште во неделата најави дека ќе бара отчет од министерот Бектеши за спојувањето на концесиите. Тоа не се случи, а дел од медиумите јавуваат дека Бектеши во моментов е на службен пат во Америка – факт што Владата го заборавила
Додека јавноста очекуваше министерот за економија Крешник Бектеши денеска да ја образложи одлуката за спојување на концесиите за рудникот Иловица, од Владата стигна информација дека денеска само формално го задолжуваат на првата наредна седница да образложува за случајот.
„Владата на денешната седница го задолжи министерот за економија, на првата наредна седница на Владата на Република Северна Македонија, да ја информира Владата за сите управни и судски постапки (одлуки, заклучоци и информации) поврзани со експлоатацијата на минерална суровина – руди на бакар и злато на локалитетот с. Иловица, Општина Босилово, почнувајќи од првата одлука до денес“,
соопшти Владата.
Вицепремиерот за економски прашања Фатмир Битиќи попладнево на новинарско прашање дополни дека откако прво Владата ќе ги добие информациите, тие ќе бидат споделени со јавноста интегрално.
„Штом Министерството за економија реферира со сите податоци, управни и судски постапки што се водени, тие веднаш ќе се споделат, не само со Владата, туку понатаму и со медиумите и со граѓаните – така како што се фактите“,
кажа Битиќи.
По лавината реакции околу спојувањето на концесиите, премиерот Димитар Ковачевски пред два дена најави дека на првата наредна владина седница, Бектеши со стручните служби од Министерството ќе треба да реферира за овој случај.
Но, на денешната, прва седница по изјавата на Ковачевски тоа не се случи, а дел од медиумите јавуваат дека министерот Бектеши во моментов е на службен пат во Америка – факт што Владата го заборавила.
Премиерот во неделата не одговори директно дали се чувствува изигран од министерот за економија Крешник Бектеши, откако тројца министри од СДСМ за ИРЛ кажаа дека Бектеши ги измамил да гласаат за дополнителна точка на владина седница, без расправа, велејќи им дека Управниот суд донел одлука за спојување на концесиите.
Истражувачката репортерска лабораторија ИРЛ, повикувајќи се на изјави на тројца министри (Каја Шукова, Оливер Спасовски и Славјанка Петровска), објави дека одлуката за спојување на концесиите дошла како дополнителна точка на владина седница, на предлог на министерот за економија Крешник Бектеши.
Министрите немале никакви прашања и сите гласале „за“ затоа што Министерството за економија на владина седница презентирало документ кој тврди дека Управниот суд барал од Владата да ги спои концесиите.
Министрите не биле запознаени со суштината на предметот, а дел од нив сега бараат одлуката да се ревидира.
Откако оваа информација одекна во јавноста, министерката за одбрана Славјанка Петровска вчера кажа дека е тежок збор да се каже дека министрите биле „изманипулирани“ или „изиграни“. Според неа, важно е што дел од нив имале доблест и побарале преиспитување на одлуката за спојување на концесиите за рудникот Иловица.
Инаку, викендот во Струмица се одржа протест против рудниците. Активистите најавија жестока битка за заштита на струмичката котлина. Велат дека ќе се борат на секое можно ниво – од општинските совети, па сè до највисоките државни истанци.
Обвинија и за политички игри и порачаа дека на избори ќе ги казнат сите лицемерни актери.