„Општина Охрид ќе направи се’ во нејзина моќ да ги исполни препораките на Владата кои се во насока на реализација на претходните препораки на УНЕСКО“ – велат од кабинетот на охридскиот градоначалник.
Владата вчера излезе со свои препораки за заштита на Охридскиот регион, помеѓу кои најзвучната е дека Охрид и Струга ќе мораат да прогласат мораториум на градежните активности се’ до донесување на планот за управување со природното и културно наследство. Општините добија и рок од 10 дена да изготват акциски план.
„Општинските надлежни служби ќе ги разгледаат законските можности во однос на владината препорака за прогласување на мораториум на градежните активности до донесување на Планот за управување со природното и културно наследство. По налог на градоначалникот Константин Георгиески, во рок од 10 дена ќе биде изготвен Акциски план со роковник за спроведување на препораките на УНЕСКО. Веднаш по изготвувањето, овој план ќе биде ставен на дневен ред на седница на Советот на Општина Охрид. Во текот на целокупниот процес, локалната самоуправа ќе биде во постојана координација и комуникација со Министерството за транспорт и врски, Министерството за култура и Министерството за животна средина и просторно планирање, како и со останатите надлежни државни институции.“,
се вели во соопштението на општина Охрид.
Освен овие одлуки, Владата вчера реши и да го повлече законот за управување со природното и културното наследство во охридскиот регион за кој невладините жестоко реагираа дека не е истиот со оној приложен до УНЕСКО, а на комисиска расправа во Собранието беше оспоруван и од опозицијата.