Наместо до 24 јули, препораките на Владата за заштита од високите температури ќе важат до 27 јули. Владата соопшти дека на денешната 64. седница, на предлог на Министерството за здравство, го измени заклучокот од претходната, 63. седница.
„Според добиените информации од Управата за хидрометеоролошки работи дека во државава високи температури се очекуваат и во деновите по 24 јули, Владата донесе одлука за измена на заклучокот од претходната седница што се однесуваше на ослободување одредени категории лица од работни обврски од 21 до 24 јули 2022 година, со тоа што овој рок е продолжен до 27 јули 2022 година“,
стои во соопштението на Владата.
Оттаму посочуваат дека препораката за ослободување од работни обврски во периодот до 27 јули се однесува на ранливите групи граѓани, меѓу кои и бремените жени и лицата над 60 години. Од оваа одлука, согласно насоките на Народниот правобранител, се иземаат хронично болните лица.
Од владата велат дека другите мерки за заштита на граѓаните од топлото време, донесени на 63. владина седница, остануваат на важност.