Од Владата обвинија дека со наводите на претседателот на ССМ се создава лажна слика за социјалниот дијалог, а во оваа смисла оттаму рекоа дека премиерот за в четврток во 16:45 часот во просториите на Владата закажал средба со претставници на Синдикатот на УПОЗ
Претседателот на ССМ, Слободан Трендафилов, претходно денеска оцени дека е добро што премиерот го прифатил барањето на УПОЗ за зголемување на платите во управата и правосудството по речиси една година протести на работниците од овој сектор, но додаде оти денеска требало да се зголемат и платите на вработените во управата за 40 отсто
Не знаеме кого чекал Трендафилов во празна сала – велат од Владата откако претседателот на Сојузот на синдикати на Македонија (ССМ), Слободан Трендафилов, објави фотографија на која седи сам во празна просторија. Во објава на Фејсбук, Трендафилов рече дека го чека премиерот Христијан Мицкоски за да ја потпише спогодбата за зголемување на минималецот на 600 евра и зголемување на останатите плати за најмалку 100 евра.
Од Владата обвинија дека со наводите на претседателот на ССМ се создава лажна слика за социјалниот дијалог. Во оваа смисла оттаму велат дека премиерот Мицкоски за в четврток во 16:45 часот во просториите на Владата закажал средба со претставници на Синдикатот на УПОЗ.
„Ова е конкретен доказ дека Владата не бега од дијалог, туку инсистира истиот да биде сериозен, суштински и насочен кон резултати. Социјалниот дијалог се води таму каде што му е местото, во институциите, со јасен план и реална намера за изнаоѓање решенија. Сите обиди истиот да се претвори во лажни наративи и самоволни појавувања, се неодговорни и штетни по интересите на работниците, кои наводно се бранат“,
велат од Владата, додавајќи дека нема да дозволат злоупотреба на социјалниот дијалог.
Претходно денеска, претседателот на ССМ информира дека премиерот утринава не се појавил во просториите на Синдикатот за да ја потпише спогодбата за зголемување на минималецот на 600 евра и зголемување на останатите плати за најмалку 100 евра. Трендафилов оцени дека е добро што премиерот го прифатил барањето на УПОЗ за зголемување на платите во управата и правосудството по речиси една година протести на работниците од овој сектор, но додаде дека денеска требало да се зголемат и платите на вработените во управата за 40 отсто.