Влада: Дијалогот со синдикатите е во тек и ќе се донесе решение за платите во јавниот сектор

На состанокот, како што информираат од Влада било најавено и дека ќе бидат формирани работни групи кои ќе работат на дефинирање на моделот за плати

Во Владата продолжи дијалогот помеѓу синдикатите и претставници на Владата за усогласување на платите во јавниот сектор со минималната плата. Претставниците на синдикатите се сретнаа со заменик-претседателот на Владата на Република Северна Македонија, Фатмир Битиќи, министерката за труд и социјална политика, Јована Тренчевска и заменик-министерот за финансии, Филип Николоски, информираат од владината прес-служба.

Вицепремиерот Битиќи на почетокот на состанокот посочил дека дијалогот во никој случај не е прекинат.

„Преговорите во последниот период се водеа по гранковите синдикати и надлежните Министерства како и дека Владата останува на ставот дека усогласување на платите треба и ќе има, но во тој процес никако не смееме да заборавиме на моменталната ситуација, солидарноста и секако ефективноста на јавната администрација“,

информираат од Влада.

ССМ на средба со Владата во однос на нивните барања за зголемување на платите

На состанокот, како што информираат од Влада било најавено и дека ќе бидат формирани работни групи кои ќе работат на дефинирање на моделот за плати кој ќе осигурува раст на платите на долг рок но и методологија која ќе ја следи продуктивноста на вработените.