Утре на полноќ завршува јавниот увид во податоците од Избирачкиот список за локалните избори што ќе се одржат на 19 октомври, додека на 13 септември завршува рокот за доставување листи за кандидати за градоначалници и за советници
Заклучно со вчера (9 септември) вкупно 5 729 граѓани, од кои 3 397 мажи и 2 332 жени, ги провериле своите податоци во Избирачкиот список за претстојните локални избори во подрачните одделенија на Државната изборна комисија (ДИК).
Осум лица, како што информираат од ДИК за државната новинска агенција МИА, побарале запишување во Избирачкиот список, за 136 лица било побарано бришење, од кои за 134 поради смрт, а за две лица поради отпуст од државата.
Дополнително, 59 лица побарале промена на податоците во Избирачкиот список најчесто поради промена на презиме или промена на адреса на живеење.
Инаку, утре на полноќ завршува јавниот увид во податоците од Избирачкиот список за локалните избори што ќе се одржат на 19 октомври. На 13 септември, пак, завршува рокот за доставување листи за кандидати за градоначалници и за советници.
Јавниот увид во Избирачкиот список може да се направи денеска до 20 часот во подрачните одделенија и канцеларии на ДИК, како и утре кога службите на Комисијата ќе работат до полноќ.
Заклучениот список со сите промени што ќе произлезат од јавниот увид ќе биде потпишан од Државната изборна комисија (ДИК) најдоцна до 3 октомври.
Можност да ги проверат своите податоци имаат сите граѓани. Тие можат да поднесат барање за запишување, дополнување или бришење на информациите. Барањата се поднесуваат писмено до подрачните одделенија или месните канцеларии на ДИК, како и по електронска пошта. Со барањето, задолжително треба да се приложат и потребните докази.
Можност за увид во списокот имаат и лицата во притвор и затвор, кои своите барања ги поднесуваат преку надлежниот орган за извршување на санкциите до ДИК.
Државната изборна комисија е должна да донесе одлука по барањата на граѓаните во рок од 24 часа. Доколку барањето биде одбиено, граѓанинот може да поднесе тужба до Управниот суд, кој исто така е должен да одлучи во рок од 24 часа.
И политичките партии имаат рок до утре да достават барање до ДИК за добивање на Избирачкиот список. По приемот на списокот, кое треба да биде најдоцна до 14 септември, тие имаат пет дена да поднесат барање за промени.
ДИК по поднесеното барање одлучува во рок од три дена, а против решението на ДИК, политичката партија може да поднесе тужба до Управниот суд во рок од 24 часа, а одлуката треба да ја добие во наредните 24 часа.
Министерството за внатрешни работи (МВР) еден ден по завршување на увидот доставува списоци на лица кои поднеле барање за нова лична карта, како и на лица кои ќе наполнат 18 години до денот на изборите. Податоци се доставуваат и од други институции, како што се органите за извршување санкции, Министерството за социјална политика и судовите, со цел ажурирање на списокот.
Изборната кампања започнува на 29 септември и ќе трае до 17 октомври. На 19 октомври ќе се гласа во 80 општини и во Градот Скопје, на 3 480 избирачки места.