Кај нас прогнозата вели – облачно со пообилни врнежи (локално над 25л/м2) кои во западните и северните делови, а на повисоките места ќе бидат претежно од снег
Ако минатата недела сите се прашуваа дали воопшто ќе има зима, со оглед на пролетните температури за новогодишните празници, од денеска вистинското зимско време, студено, со врнежи, дожд или снег, ги зафати земјите од регионот.
Снег утрово паѓа низ цела Хрватска, снег има и во Загреб, но не се очекува да се задржи на земја.
Освен во Загреб, снег паѓа и во Карловац, Сисак, Загорје…, а се очекува и во другите делови на копното на Хрватска.
Локално на Јадранот ќе врне дожд, а во подножјето на Велебит повторно снег, носен од силен ветер. Црвен аларм е вклучен од Кварнер до централна Далмација поради силен ураган.
Во другите делови, предупредувањето е портокалово. Се апелира до возачите да бидат внимателни поради силната бура и зимските услови на државниот пат преку Горски Котар.
Врнежи од снег се најавени низ цела Босна и Херцеговина, каде што е вклучен и метеоролошкиот аларм.
На северот од Црна Гора патиштата се влажни, па возачите се предупредуваат да го приспособат возењето на условите на патот, поради можни одрони.
Кај нас прогнозата вели – облачно со пообилни врнежи (локално над 25л/м2) кои во западните и северните делови, а на повисоките места ќе бидат претежно од снег. Ќе се формира нова снежна покривка, особено во западните делови. Ќе дува слаб до умерен, вдолж Повардарието повремено засилен северен ветер. Минималната температура ќе биде во интервал од 2 до 7, а максималната ќе достигне од 4 до 10 степени.
Во Скопје, облачно со врнежи од дожд, а во делови од котлината ќе има и повремени врнежи од снег. Ќе дува слаб до умерен северен ветер. Минималната температура ќе се спушти до 3, а максималната ќе достигне до 5 степени.
Во вторник ќе има повремени локални врнежи претежно од снег и ќе дува засилен северен ветер. Потоа од среда времето ќе биде стабилно со умерен северен ветер, а од четврток постудено со утрински температури кои на места ќе се спуштаат и под -10 степени, а и дневните на места ќе останат негативни.
Засега нема вклучено аларм за можно невреме.