Вицепремиерот и министер за транспорт вели дека предвидувањето на ММФ за раст од 3,2 отсто годинава е конзервативен пристап и дека тој својата проекција ја темели на логиката дека земјава троши средства во проекти кои носат раст на бруто-домашниот производ
Вицепремиерот и министер за транспорт Алекснадар Николоски очекува раст на економијата во 2025 г. над четири отсто наспроти неодамнешните предвидувања на Меѓународниот монетарен фонд дека македонскиот БДП годинава ќе има раст од 3,2 отсто. Во интервју за „360 степени“ на МРТ 1, Николоски вели дека проекцијата ја темели на логиката дека земјава троши средства во проекти кои носат раст на бруто-домашниот производ.
„Јас очекувам над четири отсто годинава, но еве ќе се видиме на почеток на следна година и ќе зборуваме. Јас очекувам дека ќе сме над четири проценти“,
рече Николоски.
Претходно, Меѓународниот монетарен фонд предвиде дека економскиот раст на земјава се очекува да биде 3,2 отсто за тековната 2025 година и 2026 година. Дополнително, оваа проекција е придружена со проценка дека инфлацијата годинава ќе достигне 3,4 отсто, а во 2026 г. се очекува да се намали на 2,2 отсто.
Светската банка, пак, во меѓувреме излезе со уште поскромни прогнози за економскиот раст на Македонија. Во редовниот економски извештај за Западен Балкан, Светската банка очекува економскиот раст на земјава годинава да биде 2,6 отсто, што е најниско во регионов.
Министерката за финансии Гордана Димитриеска-Кочоска, пак, коментирајќи ја прогнозата на ММФ, кажа дека проектираниот раст на економијата што го има утврдено Владата за годинава од 3,7 отсто е реален.
„Оваа криза, која дава голема неизвесност, ние како држава може многу да ја искористиме, во смисла на префрлање на капацитетите од европските земји. Односно капацитетите во европските земји ќе се затвораат и понатаму, затоа што царините значат повисоки набавни цени и на тој начин европскиот пазар ќе бара алтернативи за отворање капацитети онаму каде што ќе имаат на некој начин поевтина работна сила. Иако во земјава веќе не е евтина работната сила, сепак е на пониско ниво од европската. Оттука мислам дека проекцијата од 3,7 % е реална проекција“,
изјави Димитриеска-Кочоска.