За вонредното собрание на Алијансата за Албанците од крилото на Арбен Таравари, на кое е разрешен од функцијата претседател на Собранието на партијата, Фетаи вели дека тој процес е нелегитимен, како и дека не добил покана за свикување седница на тоа тело
Вицепремиерот за добро владеење Арбен Фетаи денеска потврди дека останува во ВЛЕН, односно дека продолжува да биде дел од Владата. Ова го соопшти на денешната прес-конференција на која се обрати заедно со поранешниот министер за информатичко општество и администрација Азир Алиу, посочувајќи дека продолжуваат да функционираат како организирана структура во ВЛЕН.
„Не дозволуваме волјата на членството и гласот на граѓанинот да бидат шверцувани. Продолжуваме да работиме таму каде што се носат одлуки и каде што се прават промените. Веруваме дека нашата земја има потреба од стабилност, развој, одговорно владеење и од Алијанса која нема да ја предаде довербата добиена од граѓаните. Ние не сме тука поради лични интереси. Ние сме тука поради одговорност, за да ги претвориме ветувањата во конкретни резултати. А тоа не можеме да го направиме ако ја напуштиме битката на половина пат. Ќе продолжиме како рамноправен партнер во коалицијата ВЛЕН, со иста професионалност и посветеност – служејќи им на нашите граѓани со чест и решителност. Алијансата за Албанците ќе продолжи да гради, а не да руши. Тука сме за да обединиме, а не да делиме. Ќе ја одржиме дадената доверба (беса) – да бидеме вашиот глас во институциите, во секое маало и село, и во секоја битка за правда и еднаквост“,
рече Фетаи.
За вонредното собрание на Алијансата за Албанците од крилото на Арбен Таравари, на кое е разрешен од функцијата претседател на Собранието на партијата, Фетаи вели дека тој процес е нелегитимен, како и дека не добил покана за свикување на седница на тоа тело.
Процесот го опиша како циркус, а за неговото разрешување вели дека не се добиени соодветните потписи од две третини од членовите на Собранието.
„Самите бројки што тие ги кажаа докажуваат дека немаат двотретинско мнозинство за да го свикаат тоа вонредно собрание кое, според Статутот на партијата, мораше да помине преку мене. Поканата за тоа собрание требаше да ми биде доставена, како претседател на собранието. Не видов покана, не ми беше испратена покана ниту, пак, видов потписи од две третини од членовите на Собранието, како што бара Статутот. Тоа не беше ниту собрание. Тоа беше циркус кој, за жал, веќе со недели се навикнавме да го гледаме од нашиот претседател. Имам многу едноставна порака за мојот претседател Арбен Таравари. Јас куферите ги зедов за да дојдам од Белгија и не мрдам од овде, ќе останеме, ќе ја водиме битката што ја ветивме, за која како коалиција ВЛЕН добивме 170 илјади гласа“,
кажа тој.
На поддржувачите на Таравари им порача да се освестат, како и дека доближувањето до Демократската унија за интееграција (ДУИ) ги води кон „артанизација“.
Фетаи смета дека лидерот на ДУИ, Али Ахмети и Арбен Таравари сакаат да предизвикаат политичка криза со цел земјата да ја доведат до предвремени парламентарни избори.
„Целиот овој пазар што го направи Таравари со Али Ахмети го направи за моќ и политички опстанок. Тие пресметале дека со саботирање на ВЛЕН, прво на ниво на пратениците и потоа и на владината коалиција, ќе предизвикаат политичка криза што ќе ја доведе земјата до предвремени парламентарни избори. Овој план не им успеа. Нема двојни избори. Ќе има локални избори со два многу јасни блока“,
рече Фетаи.
Според него, Владата е постабилна од кога било, посветена на реформите и кон европската интеграција.
Одговарајќи на новинарско прашање дали тие стануваат трето крило на Алијанса за Албанците, Азир Алиу посочи дека ќе продолжат да дејствуваат како организирана структура во ВЛЕН.