Репортерката на телевизијата Н1 на Твитер објави видео на кое се гледаат украински деца како спијат на подот на главната железничка станица во Варшава, Полска, каде што се наоѓаат над два милиони Украинци и околу 50 отсто до децата бегалци
Речиси илјада згради се уништени во Украина како резултат на руското гранатирање, соопшти украинската Државна служба за вонредни состојби, а повеќето од нив се станбени згради.
Руските сили повеќе од три недели жестоко го гранатираат Харков, кој се наоѓа на само 50 километри од границата со Русија. Таму, според украинските власти, се убиени најмалку 500 цивили.
Украинскиот парламент утринава соопшти дека 117 деца се убиени, а 155 се повредени во нападите на руските сили од почетокот на руската инвазија на Украина.
Според украинскиот парламент, најголем број жртви се регистрирани во Киев, Харков и Чернихов на северот на земјата.
Полска прва дестинација на бегалците
Вкупно 50 отсто од децата што ја напуштиле Украина се во Полска, а повеќе од два милиони ја преминале украинската граница. Полска прими најголем број бегалци, но границите сè уште се отворени.
Репортерката на телевизијата Н1 на Твитер објави видео на кое се гледаат украински деца како спијат на подот на главната железничка станица во Варшава, Полска.
Ukrainian children sleeping on the Central Station floor. We have just been granted permission to get into one of the top floor wings. This is what 9am looks like on #Warsaw Central. Poland is now hosting over two million refugees. | @N1info @N1infoZG @N1infoBG @N1infoSA #Ukraine pic.twitter.com/ChO0Hsbajk
— Ika Ferrer Gotić (@IkaFerrerGotic) March 22, 2022
Агенцијата за бегалци при ОН денеска соопшти дека повеќе од 3,5 милиони бегалци досега ја напуштиле Украина поради руската инвазија.
Како што се наведува во соопштението на Високиот комесаријат за бегалци на ОН (УНХЦР) од 24 февруари досега од Украина избегале 3 528 346 лица.
Првиот човек на Светската здравствена организација (СЗО), Тедрос Гебрејесус минатата недела предупреди на катастрофалните последици од војната за украинскиот народ и тешките нарушувања во обезбедувањето здравствени услуги и резерви и нагласи дека мирот сега е неопходен лек за спасување животи.