Тој се кандидира само за функцијата градоначалник и нема да има листа на советници
Професорот по економија Висар Адеми денеска официјално ја поднесе својата кандидатура за градоначалник на Општина Гостивар. Оваа информација ја сподели на својот фејсбук-профил, потенцирајќи дека кандидатурата ја поднесува како независен кандидат.
„Како независен кандидат не ѝ должам одговорност на ниту една партија, туку само на вас, моите сограѓани. Ајде заедно да донесеме промена, заедно да го направиме нашиот Гостивар подобро место. Ова не е само цел за победа, туку за трансформација на Гостивар“,
напиша тој на Фејбук.
Тој е доктор по економски науки и предава на неколку факултети.
Адеми се кандидира само за функцијата градоначаник и нема да има листа на советници.
Засега Адеми е единствениот најавен независен кандидат за градоначалник на Гостивар.
Алијанса на Албанците на Арбен Таравари кон крајот на јули најави дека актуелниот градоначалник Ваљбон Лимани е повторно кандидат за Гостивар.
Коалицијата ВЛЕН на почетокот на месецот го претстави Себаеден Даути како кандидат за градоначалник на Гостивар.
Крајниот рок за поднесување кандидатури е 13 септември.