Ексдиректорот на АНБ вели дека во работата на Одделот за внатрешна контрола не се користи терминот „истрага“, што беше искористен на брифингот во АНБ на 29 август, кога беше соопштено дека известувањата од АНБ до Обвинителството за гонење организиран криминал и корупција (ОЈО ГОКК) со индиции за незаконско, непрофесионално и неетичко постапување на еден поранешен директор и група вработени се резултат на внатрешна истрага во Агенцијата
Поранешниот директор на Агенцијата за национална безбедност (АНБ), Виктор Димовски, вели дека според информациите кои допреле до него, на предметот во Агенцијата наводно не работеле службеници од Одделот за внатрешна контрола во оваа институција, туку нивни колеги од други организациски единици кои биле прераспоредени во овој оддел.
Димовски ова го кажа во дел од интервјуто за „360 степени“, одговарајќи на прашање околу функционирањето на механизмот за внатрешна контрола во Агенцијата за национална безбедност.
Во контекст на прашањето, тој наведе и дека во работата на овој оддел не се користи терминот „истрага“, што беше искористен на брифингот во АНБ на 29 август, кога беше соопштено дека известувањата од АНБ до Обвинителството за гонење организиран криминал и корупција (ОЈО ГОКК) со индиции за незаконско, непрофесионално и неетичко постапување на еден поранешен директор и група вработени во АНБ се резултат на внатрешна истрага во Агенцијата.
Според него, или станува збор за лапсус на тие што го држеле брифингот или, пак, доколку не е така, тогаш станува збор за нешто посериозно.
„Работата на Одделот, барем така беше насловот на таа организациона едница во Агенцијата, Оддел за внатрешна контрола, е строго дефинирана со закон и со внатрешен акт на Агенцијата. Впрочем, и раководителот на тој оддел се избира со претходна согласност на собраниската Комисија за надзор над Агенцијата. Морам да ви кажам дека колку што се сеќавам на документацијата за време на моето директорување, оформивме преку шеесетина интерни документи и акти. Кога станува збор за внатрешната контрола, терминот ‘истрага’ убеден сум дека не се користел. Дали се работи, претпоставувам дека се работи за лапсус на оние коишто го држеле брифингот, меѓутоа ако не е така, тогаш се работи за нешто посериозно, се плашам да не се работи за некаква потсвест“,
вели ексдиректорот на АНБ.
Службите за безбедност, додава Димовски, не прават такви истраги, дури и во некои земји каде што постојат режими, а не се правеле ни во, како што рече, едноумието кај нас.
Одговарајќи на допополнително прашање, тој потврди дека внатрешната контрола е стандарден механизам во АНБ, но тука веднаш се надоврза на неговите сознанија за тоа дека службеници од други сектори во АНБ, по наредба на раководството биле прераспределени во Одделот за внатрешна контрола за да работат на предметот кој ги разбранува политичките страсти во земјава.
„До мене допреа одредени информации дека наводно, велам наводно, при отпочнувањето со работата на овој предмет, службениците коишто по опис и попис и со решение биле распоредени на работни места во внатрешната контрола со наредба на раквоводството наводно биле преместени на други задачи, а службеници од други оддели со наредби биле донесени во одделот (за внатрешна контрола) и им била дадена задачата да ја вршат“,
рече Димовски.
Прашан зошто според него тоа било направено, дали немале доверба во другите, тој рече дека не знае за што станува збор, но веројатно тие што го направиле тоа имале сериозна причина што ќе треба да ја соопштат.
„Ако не, тогаш тоа е спротивно на духот на Законот за национална безбедност, каде што местата на вработените се гарантирани и би можеле да извршите разместување или уназадување само во строго со закон утврдени ситуации“,
вели ексдиректорот на АНБ.
Во однос на најавените седница на надзорното собраниско тело и посета на АНБ, закажани за в среда, Димовски вели оти не му се допаѓа тоа што го гледа во Собранието околу закажувањето на седницата и надзорот.
„Многу е важно кога имаме вакви ситуации или сомнежи за вакви ситуации да профункционираат институциите. Една од иституциите којашто треба да врши вакви контроли е оваа парламентарна комисија. Мене ми е многу жал што оваа парламентарна комисија не постапи во 2022 година кога не постоеше спремност да се сослуша информацијата во врска со изнесените обвинувања во јавност (за случајот Онишченко). Мене ми е жал кога ги гледам овие сцени околу случувањата во парламентот. Се надевам дека ќе постигнат некаков договор и дека ќе се изврши контрола“,
вели тој.
Сепак, како што додаде, тука треба да се знае кои се овластувањата кои ги има Комисијата за надзор над работата на АР и АНБ, односно можноста за увид во изворни оперативни материјали.
„Има што можат да гледаат, а што не можат да гледаат. Не можат да гледаат во идентитет на тајни соработници, не можат да гледаат, ако добро се сеќавам, изворни оперативни материјали. И дотолку повеќе зачудува што некој овозможил увид во такви непосредни оперативни материјали, барем според информациите во медиумите, на лица коишто имале сериозен судир со законот во изминатиот период“,
рече Димовски во интервјуто за „360 степени“.