Прашањето за РСМ е сериозна тема која често се претвора во објект на политички злоупотреби од секаков вид. Апелирам до сите што имаат став по оваа тема да се обидеме да го оставиме на страна тврдиот емоционален став, колку и да е тешко тоа, да ги оставиме на страна обидите за трупање политичка дивиденда на една тема која има стратегиско значење за Бугарија и да го бараме возможното решение. Затоа што ситуацијата во која сме во моментов е тврда и непријатна и за РСМ и особено за Бугарија, вели заменик-претседателот на бугарското Национално собрание
Ако ме прашате денес, сметам дека немаме причина да го укинеме ветото за почеток на преговорите меѓу Република Северна Македонија и Европската Унија бидејќи до денес не е постигнат напредок по договореното, вели заменик-претседателот на Националното собрание Кристијан Вигенин во интервју за БНТ.
Но, Вигенин, кој е член на Бугарската социјалистичка партија и поранешен министер за надворешни работи, понатаму објаснува дека не може само да се седи и да се чека нешто да се случи, туку дека обете страни треба да преземат нешто.
Конкретно за Бугарија вели дека прво треба политички да не се злоупотребува темата за РСМ и да се остават настрана тврдите емоционални ставови.
„Тоа е сериозна тема која често се претвора во објект на политички злоупотреби од секаков вид. Апелирам до сите што имаат став по оваа тема да се обидеме да го оставиме на страна тврдиот емоционален став, колку и да е тешко тоа, да ги оставиме на страна обидите за трупање политичка дивиденда на една тема која има стратегиско значење за Бугарија и да го бараме возможното решение. Затоа што ситуацијата во која сме во моментов е тврда и непријатна и за РСМ и особено за Бугарија“,
вели Вигенин.
Тој истакнува дека задачата на Бугарија како држава не е да го држи ветото и да го запира напредокот на РСМ туку како политичари и државници да постигнат реализација на целите кои ги назначиле.
Тој уште еднаш тука ги посочи целите на кои инсистира Бугарија: правата на Бугарите во РСМ, заедничка историја врз основа на факти и документи, говорот на омраза…
На прашањето дали треба да се тргне ветото, Вигенин одговори:
„Ако ме прашате денес, ова утро дали ние треба да го кренеме ветото, според мене, немаме никаква основа да го направиме тоа денеска. Зашто за ништо од она што беше догорено не е постигнат напредок до денешен датум“,
рече Вигенин.
Тој објаснува дека погрешна е политиката да се чека, туку Бугарија треба да иницира исполнување на тие ангажмани. Тој тука издвојува три елементи:
„На пример, Договорот за пријателство. Треба врз база на тој договор да се бара некаква мапа со временски рамки, што треба да се направи краткорочно пред преговорите и што долгорочно по преговорите. Тоа треба да го иницираме ние и тогаш притисокот нема да биде врз нас туку врз РСМ на тие работи на кои ние инсистираме“,
објаснува Вигенин.
Потоа според него треба да се види колку од барањата на Бугарија можат да се претворат во европски барања и националниот став кон РСМ, со ограниченото дипломатско присуство во Скопје, со тоа што сè уште не е испратен амбасадор, иако, како што рече, тој е назначен.
„Овие три елементи можат да станат јасен став и да се даде време за нивно исполнување, до следната година на пример, бидејќи тоа не може да се смени за една недела, месец. Но ако се види дека има јасна иницијатива од РСМ, Бугарија и ЕУ и ако се види дека нешто се менува до почетокот на преговорите, иако нема да има видлива промена на состојбата, тоа би бил јасен сигнал дека нешто се случува“,
објасни тој.
Тој смета дека е неопходно е да се свика ново заседание на бугарскиот Консултативен совет за национална безбедност посветено на темата за Северна Македонија, бидејќи тоа прашање е „доволно контроверзно“ и само претседателот на Бугарија, Румен Радев може да ги собере сите партии на една маса за да разговараат за него.
Заклучоците на Советот би можеле потоа да бидат поддржани со одлука на Собранието или Владата на Бугарија.
Тој сепак смета дека е неприфатлив ставот на премиерот на Бугарија, Кирил Петков да се свика ново заседание на Советот само за да се види дали има некаков позитивен план за развој на односите.
Од друга страна, смета дека бугарското Собрание не би требало да донесе нова декларација во врска „со прашањето за Република Северна Македонија“, бидејќи вели дека не знае дали е време за нешто такво, во услови кога нема нов момент во однос на темата.