Официјалните бројки од ДИК покажуваа неизвесна трка за второто место за градоначалник на Куманово, а со тоа и место во вториот круг, меѓу кандидатите на СДСМ и НАИ – коалицијата предводена од ДУИ. Конечниот расплет доцна во ноќта донесе шокантен пресврт – во вториот круг влегува независниот кандидат Горан Стојковски-Диро
На прославата на ЗНАМ придонесе и резултатот во трката за Советот на Општина Куманово. Заедно со коалициските партнери, ќе имаат стабилно мнозинство
Празни кафулиња, слаба раздвиженост, сообраќајот како во секоја друга недела навечер. Околу 19 часот кога се затвораа избирачките места, атмосферата во Куманово воопшто не оддаваше впечаток дека е изборен ден.
Возбуда имаше само во партиските штабови. Во СДСМ се креираше атмосфера за славје.
Мартин Костовски и кандидатите за советници веруваа дека по два мандати, има реална шанса Максим Димитриевски да ја напушти градоначалничката фотелја.
Во штабот на ВМРО-ДПМНЕ беше тивко, што и беше разбирливо бидејќи од седумтемина кандидати за градоначалник ниту еден не беше нивен. Партијата реши да го поддржи Максим Димитриевски од ЗНАМ.
Ги чекаа гласовите за советници.
На околу двесте метри од ВМРО-ДПМНЕ беше најраздвижениот штаб – на ЗНАМ. Дел од членовите и симпатизерите беа собрани уште од крајот на гласањето. Одвреме-навреме се аплаудираше, кога аналитичкиот центар ќе излезеше со нови бројки за нивното водство.
Скандирањата беа најбурни кога се споделуваа информации за разликата помеѓу Максим Димитриевски и кандидатот на СДСМ, Мартин Костовски.
Во еден момент атмосферата ја запали поголема група симпатизери, кои скандирајќи го името на Димитриевски, придружувани од тапани, пристигнаа во штабот.
Во тој момент, по околу 80% обработени гласови, веќе беше јасно дека Максим Димитриевски влегува во втор круг со сериозна предност. Се чекаше само да се дознае кој ќе му биде противкандидат на 2 ноември.
Официјалните бројки од ДИК покажуваа неизвесна трка за второто место во Куманово, а со тоа и место во вториот круг, меѓу кандидатите на СДСМ и НАИ – коалицијата предводена од ДУИ. Конечниот расплет доцна во ноќта донесе шокантен пресврт – во вториот круг влегува независниот кандидат Горан Стојковски-Диро.
Па, првичната еуфорија во СДСМ, каде во меѓувреме пристигна и поранешниот министер Оливер Спасовски, се стиша.
Во меѓувреме, на централниот плоштад, веќе славеше ЗНАМ.
Во моментите додека го снимавме славјето на Димитриевски, се уште не беше јасен расплетот, што се чини и не беше важно за него.
„ЗНАМ ќе биде дефинитивно победник на претстојните избори на локално ниво бидејќи повеќе од јасна е желбата на граѓаните дека препознаваат континуитети развој на овој град и сакаат Куманово да продолжи да се развива во тој дух“,
порача Димитриевски.
Во еуфоријата, не заборави да каже благодарам на ВМРО-ДПМНЕ.
„Ја користам оваа прилика уште еднаш да се заблагодарам првично на сите членови и активисти на Движење ЗНАМ за наша Македонија, исто така на сите членови и активисти на ВМРО-ДПМНЕ за поддршката којашто ја добив од нив и сите останати граѓани“,
рече тој.
Димитриевски славеше и затоа што, владината коалиција ЗНАМ-ВМРО-ДПМНЕ-ПАРТИЈАТА НА СРБИТЕ-ВЛЕН со 19 мандати ќе има стабилно мнозинство во Советот кој брои 31 место.
За крај, остана уште да се прослави со хитот што некои кумановци ни рекоа дека почнал да се пее и по свадби.
„Им благодарам на моите сограѓани Роми кои што на првото отварање на мојот штаб во село … ја искомпонираа таа прекрасна песна којашто стана навистина вирална и многу сум горд на сите имиња што се споменуваат, а се надевам дека Куманово преку тоа покажува колку креативни граѓани има“,
рече Димитриевски за песната која стана вистински хит.