Драматична изборна ноќ во Тетово. Поминаа дури четири и пол часа од затворањето на гласачките места за некој да почне да слави.
Зурли, тапани и огномет донесе БЕСА. Лидерот на партијата, кој е и кандидат за градоначалник на Тетово, Биљал Касами, тврдеше дека води пред очигледниот втор круг.
„Нашата коалиција беше со народот, со сите граѓани на Тетово и понатаму нашата коалиција ќе биде со народот. Како што победи овој пат и во вториот круг народот ќе победи“,
рече Касами.
На славење не излезе никој друг, иако на последните два циклуса, зурлите и тапаните во Тетово ги носеше ДУИ. Партијата остана во своето седиште во Мала Речица, од каде во не толку еуфорична атмосфера, лидерот Али Ахмети прогласи изборна победа.
„ДУИ води убедливо во општина Тетово“,
рече Ахмети.
На прес-конференцијата на Ахмети не беше предвидено обраќање од други говорници, па и на кандидатката за трет мандат, Теута Арифи. Ја побаравме за коментар на резултатот подоцна. Но, не ја добивме ниту директно, ниту преку соработниците.
Новиот ден донесе и нови информации. Според 100% пребројани гласови, по првиот круг во Тетово води Теута Арифи, но со само 642 гласа пред Биљал Касами.
На повеќето жители на градот, епилогот не им значи многу.
„Од партиите – постојано истите партии. Постојано не лажат – ова ќе биде, она ќе биде и ништо.“
„Да се подобри животот, да има работа, убав град, патиштата да се направат. Тоа е сѐ.“
„Мислам дека беше демократски, без проблеми и очекувано.“
„Многу очекуваме, но малку веруваме дека ќе биде нешто. За градот има доста, инфраструктурата е за никаде, вработувањето, образованието.“
Имате надеж дека нешто ќе се подобри?
„Не верувам. Не верувам.“
рекоа граѓаните со кои поразговаравме.
Резултатот во Тетово и претстојниот втор круг се интересни и затоа што и ДУИ и БЕСА се партнери на СДСМ на владино ниво. Но, независно од тоа како ќе постапи СДСМ за вториот круг, има многу гласови од другите кандидати за кои ќе се борат Арифи и Касами. Сликата по првиот круг е следна:
Теута Арифи од ДУИ освои 11 138 гласови.
Биљал Касами од БЕСА 10 496.
Кандидатот на опозициската Алијанса за Албанците и Алтернатива, Вулнет Мурсели, доби 6 165 гласови.
Сади Беџети од ДПА доби 3 840,
Хамдија Елезовиќ од СДСМ освои 2 373 гласа,
ИНТЕГРА со кандидатката Снежана Стојановска – 1 989 и
Африм Ибраими од Движењето за држава и правда 378 гласа.
Следуваат две недели за комбинаторики и борба за секој глас.