Општина Центар и Општина Струга се дел од поголемите локални самоуправи во кои нема јасно мнозинство, а со тоа и претседател на тамошните совети избран од мнозинството советници
Во Струга се уште не можат да се договорат партнерите во централната власт, ВМРО-ДПМНЕ и ВЛЕН. Во Центар, правењето мнозинство зависи од повеќе субјекти
Месец и половина по првиот круг од локалните избори, на кои се бираа советници во општинските совети, се уште има такви каде ниту една партија или коалиција нема договор за мнозинство.
Таков е примерот со Општина Центар.
Според податоците од ДИК, во распределбата на мандатите, од 23 столчиња во Центар осум доби СДСМ, седум ВМРО-ДПМНЕ, три Левица, по две ЗНАМ и граѓанската иницијативата „Независни заедно“, а едно Коалицијата за зелена иднина.
На првата конститутивна седница со која раководеше највозрасната советничка немаше ниту еден предлог за избор на претседател на Совет. Кој со кого се обидува да го договори потребното мнозинство од 12 советника, прашавме кај сите групи претставени во Советот.
Од најбројната, советничката група на СДСМ велат дека се уште се координираат за да се обезбеди најдоброто решение.
Од ВМРО-ДПМНЕ, на која и недостига поддршка од тројца советници за мнозинство,под претпоставка дека поддршката од ЗНАМ е загарантирана, велат дека нивната советничка група има свој предлог. Ќе го достават на следната седница на Советот.
„Нашата цел е да се избере претседател, да не остануваме со претседавач на совет, сè со цел сите оние наши проекти коишто се поклопуваат со проектите на останатите политички партии и се од највитален интерес за граѓаните на општина Центар, што побрзо да ги реализираме. Од таа причина се трудиме да оствариме повеќе контакт со сите, меѓутоа во овој момент, за жал, сè уште нема изгледни шанси дека би можело да се избере претседател на советот“,
вели Горан Андреевски, член на Совет на Општина Центар од ВМРО-ДПМНЕ.
На прашање дали би прифатиле претседател на Советот предложен од главниот соперник, СДСМ, како знак на конструктивност, Андреевски вели:
„Ние би поддржале секаков предлог којшто е прифатлив за сите останати политички групи во советот. Се разбира, секогаш нели, би целеле да одиме на наш предлог. Меѓутоа, би поддржале сè она што е во интерес на општината“,
додава Андреевски.
Со сличен став се и советниците од ЗНАМ. Велат дека немаат ништо против ниту една партија, а изборот на прв човек на Советот го условуваат со тоа да биде квалитетен и отпорен на партиски интереси.
„Најмногу советници имаат СДСМ и ВМРО-ДПМНЕ. Така да, ние нема да дадеме предлог за претседател на советот на општината. Секако дека ќе има коалицирање и договарање. ЗНАМ на централно ниво е во коалиција со ВМРО-ДПМНЕ и тоа ќе продолжи и на локално ниво. Ние сме отворени за соработка и со други граѓански опции. Така да, сметам дека разумот ќе надвладее. Зборам разум, затоа што ние сме тука пред сè да функционира општината и да бидат граѓаните задоволни од нашето работење, а не да правиме некои тесни партиски политики“,
вели Крумислав Барзов, член на Совет на Општина Центар од ЗНАМ.
Јане Димески од коалицијата „Независни заедно“, кој беше член на Советот и во претходниот мандат, вели дека не е новина тоа што Центар не може да избере претседател на Совет. И претходно, седниците ги водела највозрасната советничка.
„Од наш аспект, ние немаме размислувано да поддржиме конкретно некој. Генерално, од претходниот мандат, некаков впечаток имаме дека можеби и не е толку важно од каде доаѓа, туку каков е, каква е личноста на човекот којшто би сакал нели да го води Советот, каков му е интегритетот, како тој ја гледа работата на Советот наспрема градоначалникот, дали тој го сфаќа тоа како продолжение нели на агендата на градоначалникот или како засебно тело кое треба да врши малце и посилен надзор, па некогаш и да врати материјали, одлуки на градоначалникот доколку не се добри. Нас пред сè нè интересира како би се поставил еден кандидат, можеби тоа еве да биде пресудно ако треба нели за некого да се одлучиме, како би се однесувал тој во однос на, во таа релација кон градоначалникот“,
вели Јане Димески, член на Совет на Општина Центар од коалиција „Независни заедно“.
Можеби немаат предлог за конкретна личност, но Димески вели дека имаат идеја како да се надмине проблемот на недостаток на мнозинство.
„Зошто не би имале на пример ротација на позицијата претседател на советот? Ако има консензус во Советот меѓу сите групи, може да се договориме по една година да имаме претседател од една партија, од една, друга, трета група и така на пример во еден мандат да се свртат четири“,
додава Димески.
Од Левица не добивме одговор каков е нивниот став во однос на изборот на претседател на Советот, а советникот Антони Новотни од коалицијата за зелена иднина порача дека за него е помалку важно од која партија доаѓа, туку поважни се организациските способности на личноста и односот кон проектите за зелена иднина.
Отсуството на потребното мнозинство за избор на претседтаел на Совет во некои општини се реши на друг начин. Во Карпош, на пример, Советот доби претседател од редовите на ВМРО-ДПМНЕ, Христо Саракинов, кој немаше да биде избран без два клучни гласа од ривалските табори – еден од СДСМ и еден од ГРОМ. Советникот на СДСМ, Радослав Трошановски, кој гласаше за кандидатот на ВМРО-ДПМНЕ, веднаш доби „шут-карта“ од матичната партија.
„Согласно Статутот на СДСМ, непочитување на одлуките, работење и гласање спротивно на интересите на СДСМ како и нанесување значителна штета на партијата повлекува одговорност, а тоа се однесува и на сите избрани советници. ИО на СДСМ најостро ги осудува сите притисоци, уцени и закани врз советниците во советите на општините на локално ниво од страна на ВМРО-ДПМНЕ, за што партијата ќе преземе соодветни мерки за нивна заштита“,
соопштија од СДСМ.
Случајот во Карпош доби јавност, но не и во Велес каде цела советничка група на СДСМ гласаше за изборот на претседател на советот од редовите на ВМРО-ДПМНЕ.
Таму, по изборите, од 23 столчиња ВМРО-ДПМНЕ освои комотно мнозинство од 16, по што следуваат СДСМ и Левица со по 3 и ЗНАМ со едно советничко место.
Советникот од СДСМ во Општина Велес, Јованче Манасков, за „360 степени“ вели дека споредбата со Општина Карпош не е соодветна. Според него, тие не постапиле спротивно на партиските одлуки. А, дури и ако гласале против, нивниот глас немало да влијае на конечниот исход.
„Претседател на совет секако ќе се избереше. Тоа значи дека не се доведува во прашање за изборот на функција, него се во прашање е нашата постапка и зошто сме донеле таква одлука. Која е пораката што сакаме да ја пратиме со таа одлука. И каде што да, имаше реакции и позитивни и негативни. Би сакал да ги истакнам, не само негативните, некои позитивни реакции, каде што граѓаните пристапија и рекоа – секоја чест за храброста на таквата одлука, покажавте една одговорност. Зошто велам одговорност? Па да, веќе тоа е институционална одговорност, затоа што советот на општина Велес е институција на сите граѓани на општина Велес, не само на ВМРО и на СДСМ. И покажавте една политичка зрелост“,
потенцира Јованче Манасков, член на Советот на Општина Велес од СДСМ.
На прашањето дали има судир на концепти и со ова се навестува „непринципиелно коалицирање“, Манасков вели дека нивниот глас „за“ не значи и поддршка.
„Нашето гласање за претседател на Совет на општина Велес не значи дека ја поддржуваме нивната политика. Напротив, ние ќе бидеме гласна, аргументирана, одговорна, транспарентна, принципиелна опозиција и ќе се спротивставиме на секое нивно лош проект или решение или одлука која што тоа и сега на почетокот го правиме. Пак ќе речам, не сакам да бидеме како нив. Ааа, они одат од таа политика, сè што е СДСМ да се одбие“,
додава Манасков.
Како ќе се носат одлуки на ниво на општиски совет, неизвесно е и во Струга.
Таму на изборите од 23 мандати, најмногу освои коалицијата предводена од ДУИ – осум. ВМРО-ДПМНЕ има шест места во советот, ВЛЕН четири, тројца независни и по еден севетник се од СДСМ и од Левица.
Иако НАИ има најбројна советничка група, ги нема потребните 12 гласа, па нивниот предлог за претседател на Советот не помина на првата седница. ВМРО-ДПМНЕ и ВЛЕН, кои го поддржаа победникот во градоначалничката трка – независниот Менди Ќура – заедно имаат десет. Па, ги прашавме дали имаат план за обезбедување мнозинство.
„Да, секако, бидејќи неспорен е нашиот директен удел и придонес во, како што спомнав, поразот на политичките структури кои се одговорни за состојбите. Но, од тука треба и да се респектира волјата на гласачите кои се и наши поддржувачи коишто не го дадоа својот глас само за советничката група, туку и за независниот кандидат кој беше поддржан од ВМРО-ДПМНЕ. Тоа треба исто така да се истакне, а уделот е значителен, така што, од нас се очекува еден таков однос и кон градоначалникот, но и во рамките на советот, на советнички групи, коалиција која ќе биде обединета околу тие веќе спомнати принципиелни основи, а тоа е законито работење во интерес на граѓаните и од тоа нема да се отстапи“,
вели Мите Стефоски , член на Советот на Општина Струга од ВМРО-ДПМНЕ.
Мите Стефоски посочува дека преговорите се водат на, како што вели, повисоко ниво. Очекува поддршка и од другите советници кои се залагаат за подобрување на работата на локалната власт.
„Не лицитираме, не е најсуштествено, спомнав, не се персоналните решенија најбитните, најбитните се оние цели четири години нормалност и работа кои треба да бидат обезбедени и да понудиме вистински луѓе на вистински места. Можности ќе имаме, соработката и со централната власт е исто така важна. Ние сите сме тука избрани за да ги претставуваме граѓаните и да направиме нешто. Преголеми се очекувањата и мислам дека треба да бидеме сите одговорни, независно од кои политички субјекти доаѓаме, сепак проблемите на Струга се навистина, за некои општини други и дури и не поимливи. Ние имаме општина која самата создала најголема дива депонија во Македонија. Ние имаме општина која ја продала зградата на јавното претпријатие Водовод и плаќа кирии на приватни лица“,
додава Стефоски.
Советникот од СДСМ во Општина Струга, Димче Шипинкаровски, вели дека до него се уште не стигнала понуда.
„Немаме видено никаква политичка платформа врз основа на којашто ќе се темели нивната коалициска соработка и немаме видено кои се бенефициите, придобивките за граѓаните. За СДСМ како партија на прво место се граѓаните, така што во овој момент од страна на политичките опоненти не видовме никаква понуда и нема што да поддржуваме во конкрентиот случај. Засега останува ставот на СДСМ да делува опозициски“,
порачува Димче Шипинкаровски, член на Советот на Општина Струга од СДСМ.
Дали тој би поддржал предлог за претседател на Советот што би дошол од ВМРО-ДПМНЕ и ВЛЕН, вели дека ќе се координира со органите на партијата.
„Доколку се одлучи да има поддршка, ќе има. Доколку не, понатаму остануваме опозициски. Ќе поддржуваме се во интерес на граѓаните, кога станува збор за интерес на граѓаните, одлуките ќе бидат прифатени, а политичкиот дел доколку нема договор нема ништо од тоа“
додава Шипинкаровски.
Инаку, Струга доби нов градоначалник по две децении во кои со општината раководеше Рамиз Мерко, со прекин меѓу 2013 и 2017 кога на чело на Струга беше Зијадин Села.