Солидарноста и соработката се важни на сите нивоа. Тоа се и социјалдемократски вредности што треба да ги зајакнеме и на други полиња, рекол Заев на средбата во Берлин со Норберт Волтер Борјанс
Претседателот на СДСМ, Зоран Заев, денеска во Берлин се сретна со лидерот на Социјалдемократската партија на Германија (СПД), Норберт Волтер Борјанс.
На средбата, како што соопштија од СДСМ, се разговарало за повеќе актуелни теми, како справувањето со пандемијата на ковид – 19, процесот на интеграција на Северна Македонија во ЕУ, како и за соработката меѓу Сојузна Република Германија и нашата земја.
Претседателот Заев се заблагодарил за континуираната силна и безусловна поддршка на Германија кон Северна Македонија во делот на евроинтеграциите и изрази уверување дека таа ќе продолжи, а истовремено ќе се продлабочува и успешната соработка помеѓу СДСМ и СПД.
„Северна Македонија е горда што има сојузник и голем поддржувач во Германија, а СДСМ е горда што има партнер и пријател во СПД. Таквите успешни соработки треба да продолжат уште позасилено особено во овој период кога коронавирусот се уште е најголемата глобална закана. Ковид-кризата нѐ научи дека солидарноста и соработката се важни на сите нивоа. Тоа се и социјалдемократски вредности кои треба да ги зајакнеме и промовираме и на други полиња“,
порачал Заев.
Борјанс, како што информираат од СДСМ, ја реафирмирал заложбата на Германија за забрзување на интегративниот процес на Северна Македонија кон ЕУ, а средбата ја искористил и да упати честитки до Заев за награда за човекови права на Фондацијата „Фридрих Еберт“, која ќе му биде врачена попладнево во Берлин, на церемонија што ќе ја отвори германскиот шеф на дипломатијата Хајко Маас.