Од ВМРО-ДПМНЕ бараат кривична одговорност за, според нив, здравствениот скандал со обидот за набавка на кинеската вакцина преку приватна фирма. Санкцијата треба да биде поголема, сметаат оттаму, бидејќи, освен за набавката, треба да се понесе вина и за ризикот во кој биле доведени граѓаните и јавното здравје со погрешното дејствување и со набавката на вакцини.
„Денес, за жал, дознаваме дека трката по провизии била побитна од набавката на вакцини. Заев и Филипче не ја следеле регуларната процедура за набавка преку државните канали и ангажирале фантом-фирма регистрирана во Хонгконг. Премиерот Заев денеска истакна дека таа приватна компанија била ‘Пауер Чајна’, односно ‘Синохидро’. Но, според она што може да се види во регистарот на овие компании, ниту ‘Синохидро’ ниту ‘Пауер Чајна’ не се регистрирани во Хонгконг. Ниту, пак, истите важат за фантом-фирми. Затоа, прашањето до Заев и до Филипче е како ја одбрале фантом-фирмата од Хонгконг и зошто преку оваа фирма требало да оди набавката на вакцини, и дали била дадена банкарска гаранција, и дали постои преддоговор со министерството за здравство?“,
вели членот на ИК на ВМРО-ДПМНЕ. Антонијо Милошоски.
Според Милошоски, трагично во целата ситуација е што од декември 2020 година, кога се направени контактите со фантом-фирмата до денес, се поминати речиси три месеци, а во тие три месеци во Македонија нема вакцини, има само зголемен број заразени и, за жал, како што вели, наши сограѓани го изгубија животот во борбата со пандемијата.