Заедничката седница почна утрово и премиерите Ковачевски и Петков веќе ги имаа воведните обраќања
Владите на Северна Македонија и Бугарија денеска во резиденцијата „Бојана“ во Софија одржуваат заедничка седница, на која, меѓу другото, е предвидено и потпишување на неколку билатерални документи.
Со седницата копретседаваат премиерите Димитар Ковачевски и Кирил Петков, кои веќе имаа воведни обраќања.
Заедничката седница следува по минатонеделната официјална посета на бугарскиот премиер Петков на Скопје, кога беше договорено формирање работни групи од двете страни. Работните групи за економија, трговија и иновации; за инфраструктура, транспорт и поврзување; за европска интеграција и зелени политики и за култура, наука и образование треба интензивно да работат за надминување на недоразбирањата и за зајакнување на соработката меѓу двете земји.
Работните групи ги предводат ресорните министри од двете земји, ќе ротираат согласно тематиката, која ќе биде ставена на дневен ред на состаноците, а членови се претставници на надлежните министерства и институции.
Областа на историјата и натаму ќе ја покрива мешовитата историска комисија, која ја формираа претходните влади во Скопје и во Софија.
Ковачевски и Петков денеска ќе имаат воведно обраќање пред почетокот на состаноците на работните групи, по што ќе остварат тет-а-тет средба, а четирите работни групи ќе имаат паралелни состаноци.
По завршувањето на состаноците предвидено е потпишување на неколку билатерални договори:
- Меморандум за разбирање и соработка во областа на земјоделството, аграрните науки, селските реони и горското стопанство, кој ќе биде потпишан од министрите за земјоделство на Северна Македонија и Бугарија, Љупчо Николовски и Иван Иванов.
- Министрите за економија на двете земји, Крешник Бектеши и Даниел Лорер, ќе потпишат меморандум за разбирање помеѓу ИАНМСП и Агенцијата за поттикнување на претприемништвото на Северна Македонија.
- Министрите за транспорт и врски, Блајог Бочварски и Николај Сабев, пак ќе потпишат: Меморандум за либерализација на стоки за и од трети земји; меморандум за развој на железничкото поврзување Скопје-Софија, преку формирање на заедничка работна група, со цел забрзување на изградбата на железничкиот коридор 8 и иницијатива за воспоставување на авиолинија – Софија – Скопје.
Во рамки на официјалната посета на владината делегација на Северна Македонија на Софија, министрите за надворешни работи, Бујар Османи и Теодора Генчовска вчера остварија средба на која изразија задоволство од интензивирањето на дијалогот во последните недели.
Од МНР информираа дека на средбата била разгледана актуелната состојба на политичкиот дијалог и билатералните односи, вклучително и во контекст на имплементацијата на Договорот за пријателство, добрососедство и соработка од 2017 година. Се разговарало и за одговорот на С Македонија од декември минатата година на предлозите од Бугарија за пакетот за политички прашања „5 + 1”.
За време на посетата на Петков на Скопје, пак, беше објавено Бугарија се согласува да го користи краткото име на државата – Северна Македонија, подеднакво како и долгото Република Северна Македонија, што беше едно од барањата во патоказот „пет плус еден“. Но, како што, наведе претседателот Стево Пендаровски, новиот пристап во соработката значи и нова методологија за работа, така што де факто нема повеќе пла „пет плус еден“.