Новото издание на емисијата „360 степени”, во кое донесуваме одделни интервјуа со адвокатката Сузана Јошевска-Анастасовска, заменик-министерот за економија Марјан Ристески и директорката на Клиниката за пластична хирургија Јасмина Ѓоргиевска Павловска, се емитува вечерва (24 март 2025 г.) од 20:15 часот на МРТ 1
Новото издание на емисијата „360 степени“, кое се емитува вечерва (24 март 2025 г.) на МРТ 1, е поделено на три сегменти. Првиот е посветен на досегашниот тек на истрагата за пожарот во т.н. кабаре „Пулс“ во Кочани и дилемите што се појавија во врска со тоа – зошто обвинителството се реши за мегапредмет, зошто сите 27-мина се осомничени за исто кривично дело, како се прави врска за „верижни пропусти“, зошто во веригата ги нема актуелните директори на ДПИ и ДЗС, а ни актуелните полициски функционери во Кочани и Штип. На овие прашања за соговорничка ја имаме адвокатката Сузана Јошевска-Анастасовска. Во вториот дел, со заменик-министерот за економија и труд Марјан Ристески разговараме за издавањето лиценци за дискотеки, ноќни клубови и кабареа, кој е вработениот осомничен дека примил мито за фалсификувана лиценца, кои се слабите точки во актуелниот Закон за угостителската дејност (по измените во 2008 г.) и во која насока ќе одат најавените измени. Во третиот сегмент гостинка е директорката на Клиниката за пластична и реконструктивна хирургија, Јасмина Ѓоргиевска-Павловска, со која разговараме за текот на лекувањето на повредените, типот на повредите, прифаќањето на оние што се згрижени во странство, капацитетите на македонскиот здравствен систем, а ја прашуваме и дали на земјава ѝ треба специјализиран центар за третирање изгореници.
Емисијата се емитува од 20:15 ч. на МРТ 1.