Новото издание на емисијата „360 степени”, во кое гостува претседателот на Собранието, Африм Гаши, се емитува вечерва (17 февруари 2025 г.) од 20:15 часот на МРТ 1
Какво значење имаат за Македонија разликите меѓу новата американска администрација и Европа за важни теми и вредносни прашања на кои сведочиме во изминатите неколку дена, е првиот корпус прашања на кои разговараме со претседателот на Собранието, Африм Гаши, кој гостува во новото издание на емисијата „360 степени“ на МРТ 1. Гаши го прашуваме и како понатаму со блокираните пристапни преговори на земјава со ЕУ откако по средбата на шефовите на дипломатиите Муцунски и Георгиев во Минхен стана јасно дека политичката влада во Софија не прифаќа одново преговарање на договореното во јули 2022 година. Како би се поставил тој ако во еден момент премиерот Христијан Мицкоски каже дека почнува процедура за уставни измени за внесување на Бугарите под услов во исто време да се усвои и нов државен грб. Едно од прашањата е и до каде е подготовката на закон за соодветна и правична застапеност по укинувањето на т.н. балансер. Тема се и интерпелацијата за пет члена на Судскиот совет, владината иницијатива за разрешување на државниот јавен обвинител Љупчо Коцевски, предлог-составот на Советот на АВМУ за кој имаше и домашни и странски реакции.
Емисијата се емитува од 20:15 часот на МРТ 1.