Новото издание на емисијата „360 степени“, во кое гостува новиот потпретседател на ДУИ, Арјанит Хоџа, се емитува вечерва (30 март 2026 г.) од 20:15 часот на МРТ 1
Локалните избори и исходот од нив ја сменија очекуваната динамика кај партиите на Албанците. Коалицијата предводена од ДУИ освои најмногу гласови на советничките листи, но ВЛЕН со помош на ВМРО-ДПМНЕ ги освои градоначалничките места во клучни општини и го потврди легитимитетот да биде дел од централната власт. Таквиот исход од изборите, пак, ја стави ад акта најавуваната кампања и притисок од ДУИ за предвремени избори. Во меѓувреме, ВЛЕН најавува трансформација од коалиција во еден политички субјект, а ДУИ се обидува да се реформира и да промовира нови лица. Во тој процес се случи партијата што ја предводеше Арјанит Хоџа да се спои со ДУИ, а лично тој да стане потпретседател на ДУИ. Арјанит Хоџа е гостин во новото издание на емисијата „360 степени“ на МРТ 1. Како се случи некој што ДУИ ја имаше за архетипски ривал (непријател) да стане нејзин потпретседател, дали згреши кога се раздели со Билал Касами и БЕСА, зошто од ДУИ веќе не го слушаме барањето за предвремени избори, дали пресовите на неетнички теми се за да му се допаднат на Мицкоски, кој е договорот за враќањето на Артан Груби, како до деблокада на пристапниот процес во ЕУ – се дел од темите на кои разговараме со Хоџа.
Емисијата се емитува од 20:15 часот на МРТ 1.