На детето му се констатирани телесни повреди во болницата „Свети Наум Охридски“
Возач со мотор удира дете на необележан пешачки премин и бега. Ова се гледа на видеото што денеска е објавено на социјалните мрежи. Според коментарите под објавеното видео може да се заклучи дека настанот се случил во скопски Бутел.
На видеото се гледа како две деца, кои веројатно се враќаат дома од блиското училиште, сакаат да ја преминат фрекфентната улица. Едно од возилата застанува, а едното од децата почнува да ја преминува улицата.
Стигнувајќи до половина на колозозот, во детето удира мотор и го бутка на земјата. Возачот на моторот не застанува на местото на настанот. Детето веднаш станува и почнува да трча. Возачите на автомобилите притрчуваат да видат во каква состојба е детето.
Од Министерството за внатрешни работи (МВР) вечерва информираат дека возачот е пронајден и против него ќе биде поднесена кривична пријава по брза постапка.
„Настанот се случи вчера, 2 април 2024 година во 14.05 часот на крстосницата на улиците „Ферид Бајрам“ и „Алпи“ во Скопје, кога мопед удри осумгодишно дете и го напушти настанот. На детето му се констатирани телесни повреди во болницата ‘Свети Наум Охридски‘“,
се вели во соопштението од полицијата.
Возачот Ч.Т. (63) од Скопје е пронајден и против него ќе биде поднесена кривична пријава по брза постапка за загрозување на безбедноста на сообраќајот, за безобзирно возење и за неукажување помош на лице повредено во сообраќајна незгода.