Новата министерка за одбрана ја презема функцијата пред втората годишнина од членството на С Македонија во НАТО, чин што се официјализираше во март 2020 година, во третата година од мандатот на Шекеринска на чело на МО
На посебна церемонија пред Министерството за одбрана, досегашната министерка Радмила Шекеринска ѝ ја предаде функцијата на нејзината наследничка Славјанка Петровска.
Новата министерка за одбрана ја презема функцијата пред втората годишнина од членството на С Македонија во НАТО, чин што се официјализираше во март 2020 година, односно во третата година од мандатот на Шекеринска на чело на МО.
По најавите за избор на ново раководство на СДСМ и на нова влада, Шекеринска, која во последните две децении извршуваше највисоки функции во партијата, а беше и пратеничка во неколку мандати, како и вицепремиерка за евроинтеграции во периодот 2002-2006 година, соопшти дека се повлекува од извршната власт. За нова министерка доаѓа Петровска, досегашна пратеничка на СДСМ, која во почетоците на кариерата блиско соработуваше со Шекеринска, во нејзиниот кабинет во Секретаријатот за европски прашања, а потоа и во Собранието.