Мора постојано да го имаме предвид фактот дека климатските промени не се родово неутрални и имаат силни родово базирани димензии, рече министерката за труд и социјална политика пред форумот на светската организација
Концептот на еднакви можности е еден од клучните приоритети на Владата на Северна Македонија, што значи дека жените и мажите треба да имаат еднакви права и еднаков глас во граѓанскиот и во политичкиот живот. Ова е концептот со кој нашата земја беше и сè уште е признаена како лидер во регионот, рече министерката за труд и социјална политика Јованка Тренчевска во обраќањето на 66. седница на Комисијата за статусот на жените во ОН во Њујорк.
Тренчевска ги посочи достигнувањата и предизвиците во оваа област, кои, како што рече, се главна мотивација и фокус во понатамошното работење.
„Мора постојано да го имаме предвид фактот дека климатските промени не се родово неутрални и имаат силни родово базирани димензии. Сакам да го изразам моето огромно задоволство што нашата земја ја препозна важноста на ова прашање и стана една од првите во регионот што започна со вакви активности. Имено, почнавме како прва земја во регионот која номинираше родова фокална точка на UNFCC и за само 5 години лесно можеме да потврдиме дека се приближуваме кон постигнувањето на нашата прва цел, развој на родово одговорни акции за климатски промени и политики за родова еднаквост со климатска отпорност“,
рече Тренчевска.