„Кого заклучуваш? Ќе ѕвонам на полиција да те пријавам, бе. Кој ти дава право?“, извикуваше координаторот на ВМРО-ДПМНЕ, Никола Мицевски
Тензична атмосфера вечерва завладеа во собраниската сала каде се одржуваат пленарните седници.
По 22 часот, претседателот Талат Џафери нареди да се заклучи вратата на собраниската сала за да можат службите да ги пребројат присутните пратеници.
По ова, пратениците од опозицијата се собраа пред претседателот на Собранието, и бурно реагираа. Тој бараше од нив, да направат список на пријавени за збор по 15. точка – Дополнет предлог на закон за спречување перење пари и финансирање на тероризам.
„Да видите како во Собранието кога треба да се пријавуваме за дневен ред се заклучува врата од Собранието“,
вели пратеникот Миле Лефков во видео кое го објави од собраниската сала.
„Кого заклучуваш? Ќе ѕвонам на полиција да те пријавам, бе. Кој ти дава право?“,
довикуваше координаторот на пратеничката група на ВМРО-ДПМНЕ, Никола Мицевски, се слуша во истото видео што го објави Лефков.
Состојбата се смири откако службите ги пребројаа пратениците по што вратата на салата беше отклучена. Во салата беа присутни 38 пратеници.
Претседателот на Парламентот Талат Џафери рече дека, согласно Деловникот, Собранието може да работи без кворум, но не може да одлучува.
Сепак, седницата не продолжи уште долго и неколку минути пред 23 часот Џафери ја прекина.