Демонстрантите реагирале дека претставата, во која настапува познатиот холивудски актер Џон Малкович, а која ги претставува Бугарите за време на српско-бугарската војна (1885), е антибугарска, дека ги исмева и навредува бугарските војници и бугарскиот народ, односно дека е навреда за националните и христијански вредности. Тие се конфронтирале со директорот на театарот, Васил Василев, и со продуцентот на претставата, а во еден момент дошло и до физичка пресметка
Стотици граѓани, меѓу кои и европратеникот Ангел Џамбаски, синоќа предизвикале инцидент пред Народниот театар „Иван Вазов“ во Софија, оневозможувајќи да се одигра претставата „Оружје и човекот“ во која настапува познатиот холивудски актер Џон Малкович. Претставата е заснована на текстот на Бернард Шо и претставува пародија на национализмот и империјализмот.
Демонстрантите реагирале дека претставата, која ги претставува Бугарите за време на српско-бугарската војна (1885), е антибугарска, дека ги исмева и навредува бугарските војници и бугарскиот народ, односно дека е навреда за националните и христијански вредности.
Тие се конфронтирале со директорот на театарот, Васил Василев, и со продуцентот на претставата, а во еден момент дошло и до физичка пресметка.
За време на судирот биле нападнати и актерот Владо Пенев, кому му биле земени и скршени очилата, и познатиот режисер и сценарист Тео Ушев.
„Апсолутно е неприфатливо да се спречат луѓето во една демократска земја да гледаат театарски претстави и концерти. Купив билет и околу 18:30 часот видов дека има полиција и многу луѓе пред театарот. Мислев дека сите дошле за претставата. Ги прашав полицајците како да влезам и тие прилично иронично ми рекоа јас и девојка ми да застанеме настрана и да чекаме. Од некаде се појави европратеникот Ангел Џамбаски, кој почна да ги вика луѓето да дојдат кај него. За секунда бевме опкружени со момци кои ставија маски и почнаа да нѐ удираат со клоци по бубрези“,
изјавил Ушев за ТВ Нова.
Директорот на театарот, Васил Василев, смета дека нема проблем во претставата.
„Имаше притисок да се цензурира оваа претстава уште пред да се изведе, ова е неприфатливо, ова не беше мирен протест. Излегов смирено кон демонстрантите, ги повикав да дозволат оваа претстава да се изведе и да дадат оценка“,
кажа Василев за БНТ.
Претседателот на Сојузот на уметници во Бугарија, Христо Мутафчиев, во изјава за БНТ вели дека претставата никако не ги понижува Бугарите, бугарската историја и бугарските војници од српско-бугарската војна.
„Напротив, нè прави горди на нив“,
вели Мутафчиев.
Според него, протестот го организирале „некои луѓе кои не успеале да дојдат на власт и кои се обидуваат да владеат со народот на малку поинаков начин и да извлечат политички поени од целата оваа ситуација“.
Министерот за внатрешни работи Атанас Илков, пак, за тензиите пред вратите на театарот, го обвини токму директорот Василев.
„Протестот пред Народниот театар беше најавен. Во обезбедувањето беа вклучени повеќе од 60 вработени, по настанувањето на тензијата се вклучија дополнителни сили кои вршеа патролни активности на територијата на Софија. Дополнителната тензија произлезе од несоодветната постапка на директорот на театарот кој отишол да разговара со демонстрантите. Не ја проценил ситуацијата, дека има тензија пред театарот, морал да ги координира своите постапки со нас, за да не дојде до ескалација на тензијата“,
изјави Илков.
Причина за протестот пред Народниот театар „Иван Вазов“ беше одлуката да се постави претставата на Бернард Шо, „Човекот и оружјето“, која се смета за навредлива за бугарското општество, бидејќи ги претставува Бугарите за време на српско-бугарската војна (1885).
Датумот на кој требаше да се изведе претставата беше синоќа, на 7 ноември – годишнината од словенската епопеја, каде Бугарите ја бранеа Унијата и својата независност. Нивниот подвиг го овековечи и Иван Вазов, чие име го носи Народниот театар.
Следниот датум, 8 ноември, е поврзан со окупацијата на западната периферија од Србија, каде до ден денес Белград води политика на бришење сè што е бугарско, пишува БГНЕС.
Третиот датум е 27 ноември – годишнината од потпишувањето на Договорот од Ној.
За дел од бугарските граѓани, поклопувањето на овие датуми со претставата на Малкович, е повод да тврдат дека претставата е директна провокација и навреда на бугарската меморија.