Прославата почна рано на плоштадот Скендербег. Изет Меџити, доскорешниот сопартиец на Бујар Османи, рано и прогласи победа над својот противкандидат уште во првиот круг. Османи преку социјалните медиуми честиташе и кажа дека наскоро ќе донесе одлука за својата политичка кариера
По синоќешното славје, граѓаните уште денеска сакаат да видат промена на подобро. Иако, има такви кои не веруваат дека тоа и ќе се случи
Изборот на Изет Меџити за градоначалник уште во првиот круг, природно наметна ден по изборите да прашаме низ Чаир – што очекуваат од Меџити, кој во три мандати – од 2005 до 2017 година, веќе ја извршуваше оваа функција.
Јас мислам дека почетна фаза во Чаир е да се исчисти, како што прееска реков – оваа депонија да исчезне и да се фокусираат на чистота. А потоа само по себе доаѓаат други работи, значи паркинзи…
Изет ништо, дваесет и кусур години, ниту еден шајка не ставил никаде.
Нови се овие, но мора да се подобри, овој е нов, се надеваме дека ќе се подобри.
Ништо, еве го ѓубрето, исти се сите.
велат дел од жителите на Чаир.
Изет Меџити победи со 15 733 гласа, наспроти 12 264 колку што освои неговиот главен противкандидат Бујар Османи. Тоа не беше битка само за градоначалник туку и битка меѓу двајца доскорешни сопартијци и битка меѓу коалицијата ВЛЕН и коалицијата предводена од ДУИ.
Победникот во таа битка почна да се насетува уште пред ДИК да почне да ги објавува резултатите, во Централниот изборен штаб на ВЛЕН кај плоштадот Скендербег во Скопје.
Првата прес-конференција на ВЛЕН, веднаш по затворањето на избирачките места, сепак беше само оценка на процесот на гласање.
„Ова е сликата што ја посакуваме за нашата земја, еден фер и мирен процес, кој покажува дека демократијата се зајакнува“,
рече Дритон Сулејмани, портпарол на Централен изборен штаб на ВЛЕН.
Меѓу првите партиски функционери во штабот пристигна актуелниот градоначалник на Чаир, Висар Ганиу. Набргу по него и кандидатот за градоначалник на Скопје, Башким Бакиу. Меѓу присутните веќе се прошири информација дека првичните резултати покажуваат водство на Меџити во Чаир.
Меџити пристигна пред 20 часот, што ја крена атмосферата. Поддржувачите веќе споделуваа информации дека победата е се поизвесна и тоа уште во првиот круг.
„Какви се очекувањата, имате информации каде води ВЛЕН? Да, цел Чаир. – Што очекувате вие од идниот градоначалник? – Се најдобро. Мислам дека ќе биде длабока победа. За Изет Меџити!“
„Изет добива!“
„Ние знаевме од пред една недела дека ќе победиме!“
Победничката еуфорија завладеа надвор, на плоштадот. Внатре, во штабот, новинарите немаа пристап. Но беше јасно какво е расположението.
Околу 20 часот и 30 минути веќе се чекаше обраќање на Меџити.
„Користам прилика за ДУИ и Ахмети кои се залагаа за легитимитет да им честитам за победата во Пласница, додека во другите општини убедливо води ВЛЕН. Тука сме во Чаир да ја прогласиме убедливата победа уште во првиот круг и сакам да им се заблагаодрам на сите граѓани, на сите гласачи, на сите активисти, форум за жени, форум за млади, сите заедници. Битката беше за легитимитет, тие сакаа да се бориме за легитимитет, посакуваа да се мериме уште еднаш во Чаир и Тетово и убедлива е победата на ВЛЕН“,
кажа Меџити на прес-конференцијата.
По пресот, Меџити излезе пред штабот каде со овации го пречекаа поддржувачите на ВЛЕН.
Сега со Владата, со градот, со претпријатието, со општината, Чаир ќе го промени својот изглед и ќе биде најубавиот дел од градот Скопје. Почнувајќи од подземната инфраструктура до универзитетите. Што и да кажам малце е, честито, да ја прославиме победата!
порача Меџити.
Меѓу присутните беше и претседателот на Собранието, Африм Гаши.
„Немаше ниту еден инцидент, ниту нерегуларности. Тоа е најголемата победа според мене. Што се однесува до партиските резултати, нормално, партиите си слават во општините каде поминаа во прв круг. Во ВЛЕН мислам тоа беше очекувано. Има мали изненадувања, но не сум јас повикан да зборам во нивно име. Јас сум многу среќен што поминавме низ еден прекрасен изборен процес,“
порача Гаши.
Од плоштадот Скендербег прославата се пренесе и низ улиците на Чаир. А, длабоко во населбата е скопското седиште на ДУИ. Тишината околу него ја разбиваше само по некое возило од славеничкиот карван на ВЛЕН.
Обраќањето на кандидатот на ДУИ Бујар Османи се случи преку социјалните мрежи. Ја честиташе победата на Меџити.
„Доволно долго сум во политиката за да ги препознавам и почитувам пораките што граѓаните ги испраќаат. Иако кампањата не беше ни фер ни легална во секој аспект, не сакам да се жалам, затоа што верувам дека искреноста и вредностите имаат смисла само кога ги одржувате, дури и во вакви ситуации“,
порача Османи.
ВЛЕН славеа на плоштадот Скендербег и низ Чаир до околу 23 часот. Коалицијата, на завршната прес-конференција, соопшти дека освен во Чаир во првиот круг победиле и во Арачиново, Боговиње, Желино, Сарај и Теарце. Според денешните резултати на ДИК, во Боговиње, сепак, ќе има втор круг.
